جامعہ اسلامیہ بھٹکل کے ہونہار فرزند کابڑا کارنامہ ۔ انٹرنیشنل سطح پر روشن کیا بھٹکل کانام
بھٹکل 15 جنوری ( ایس او نیوز) کہتے ہیں کہ درخت اپنے پھل سے پہچانا جاتا ہے اور تعلیمی ادارے اپنے فارغین کی لیاقت اور صلاحیت سے پہچانے جاتے ہیں، ہندوستان میں بڑے تعلیمی اداروں کا نام کچھ شخصیات نے ہی روشن کیا ہے ، الحمد للہ بھٹکل کے دینی و عصری تعلیم گاہوں کے طلبہ و طالبات بھی بڑی حد تک اپنی مادر علمی کی نیک نامی کا سبب بنے ہیں ۔ ماضی میں ہمارے کئی نوجوانوں کی وجہ سے بھٹکل کے تعلیمی اداروں کا نام روشن ہوا ہے ۔ تازہ ڈیولپمینٹ یہ ہے کہ بھٹکل کے نوجوان عالم دین اور جامعہ اسلامیہ بھٹکل کے ہونہار فارغ اور مدرسہ خیر العلوم بھٹکل کے استاد حدیث و ادب مولوی طارق ابن مولانا صادق اکرمی ندوی نے دبئی میں واقع عربی ادب کی ترویج اور اس کی نشر واشاعت کا ادارہ ’ دارالیاسمین کی ‘ جانب سے منعقد عربی قصیدہ گوئی کے ایک مقابلہ میں عربی زبان میں لکھنے والے ہندوستانی شعرا میں پہلا مقام حاصل کر کے اپنی مادر علمی اور بھٹکل کا نام روشن کیا ہے۔
دارالیاسمین کی مینیجنگ ڈائریکٹر ڈاکٹر مریم شناصی کے زیر نگرانی چلنے والے اس اشاعتی ادارے نے گزشتہ دنوں انٹرنیشنل پیمانے پر ایک قصیدہ گوئی کا مقابلہ منعقد کیا تھا جس میں ہندوستانی زمرے میں کم و بیش 50 عربی شعرا نے ملک کے مختلف مقامات سےمقابلہ میں شرکت کی تھی، 13 جنوری کو زوم پر ہوئے اس پروگرام میں مریم شناصی سمیت مقابلے کے جج صاحبان نے بھی گفتگوکرتے ہوئے بڑی خوشی کا اظہار کیا تھا اور اپنے تاثرات میں کہا تھا کہ مقابلہ میں ممتاز مقام حاصل کرنے والے شاعر کے یہاں نہ تو عربی گرامر کی خامیاں تھیں اور نہ ہی فنی اور عروضی اعتبار سے کسی قسم کی کمی تھی بلکہ ممتاز مساہمین کا کلام ہر قسم کے فنی و لسانی عیوب سے پاک تھا۔
خیال رہے کہ اس مقابلے میں دبئی سے ڈاکٹر طلال جنیبی اور مصر سے اشرف ابو الیزید اور کویت سے سالم الرمیضی نے حکم کے فرائض انجام دیئے تھے جن کا شماراس میدان کے ماہرین میں ہوتا ہے۔
کالی کٹ (کیرالہ) کے فاروق کالج میں منعقد ایک تقریب میں مولوی طارق اکرمی ندوی کو اسناد اور نقد انعام سے نوازاگیا۔
خیال رہے کہ کچھ ماہ قبل ہی مولوی طارق اکرمی ندوی کی لکھی ہوئی ایک نعت بعض عربی ملک کی ثانوی تعلیم گاہ میں داخل نصاب بھی کی گئی تھی جس کی تفصیلات انٹر نیٹ پر دستیاب ہیں۔
یاد رہے کہ 2012 میں دبئی میں منعقد جائزۃ دبئی مسابقہ القرآن میں مولوی طارق اکرمی نے ہندوستان کی نمائندگی کی تھی۔ اس وقت مولوی طارق مدرسہ خیر العلوم بھٹکل میں حدیث اور ادب کے استاذ ہیں ، ساتھ ہی ہفتے میں دو دن نوائط کالونی کی مسجد عائشہ میں نوائطی زبان میں درس قرآن پیش کرتے ہیں جس سے علاقے کے علاوہ باہر کے لوگ بھی مستفید ہو رہے ہیں۔ مولوی طارق کی اس کامیابی پر مدرسہ خیر العلوم کے ذمہ داران اوراساتذہ سمیت شہر کی بعض ممتاز علمی و ادبی شخصیات نے خوشی کا اظہار کرتے ہوئے انہیں مبارکباد دی ہے ۔
