بھٹکل،15/اگست(ایس اونیوز) بھٹکل تعلقہ کے بینندور میں  جمعہ کے روز ایک پرانی دشمنی کو لے کر  ایک شخص کا قتل ہوگیا تھا جس کے بعد پولس نے 13 لوگوں کے خلاف معاملہ درج کرلیا ہے۔

مہلوک شخص کی شناخت پدمیّا جٹپا نائک (44سال) کے طور پر کی گئی ہے۔ جبکہ جن لوگوں کے خلاف معاملہ درج کیا گیا ہے، اُن کی  شناخت بینندور کے ہی رہنے والے  جینت نائک، منجوناتھ نائک،  دیویندر نائک، سبرامنیا نائک،   بلیندر نائک، ایشور نائک،  گنپتی نائک، کرشنا نائک،  سنتوش نائک،  مہیش نائک،  سریش نائک، سنیل نائک اور مادیو نائک کی حیثیت سے کی گئی ہے۔

بتایا گیا  ہے کہ مہلوک پدمیا نائک جمعہ کے دن 3بجے کے قریب شیرور میں واقع ایک ڈیری کو دودھ سپلائی کرکے گھر واپس لوٹ رہا تھا۔جس کے دوران 20-22 لوگوں نے اس کو گھیر لیا اور اس پر حملہ کردیا۔

معلوم ہوا ہے کہ ایک زمین کے تنازع کو لے کر بھٹکل کے دیہی پولیس تھانہ   میں جولائی کے مہینے میں ایک کیس دائر کیا گیا تھا۔ اسی جھگڑے میں کچھ لوگ پدمیّا جٹپا نائک کے دشمن ہوگئے تھے۔ شبہ ہے کہ اسی معاملے سے متعلق بدلے کی کارروائی میں اس کو قتل کردیا گیا ہے۔

بھٹکل کے اسسٹنٹ سپرنٹنڈنٹ آف پولیس نکھل بی نے تعلقہ اسپتال میں پہنچ کر مہلوک کے بھائی کا بیان درج کرواتے ہوئے پولیس نے کیس داخل کرلیا ،  معاملے کو لے کر   مزید چھان بین  جاری ہے۔