بھٹکل کے سابق رکن اسمبلی جے ڈی نائک دوبارہ کانگریس میں شامل؛ کہا، اننت کمار ہیگڈے کو شکست دینا میرا مقصد
بھٹکل:20؍فروری (ایس او نیوز) توقع کے مطابق بھٹکل کے سابق رکن اسمبلی جے ڈی نائک بدھ کو بنگلورو کی کرناٹکا پردیش کانگریس کمیٹی (کے پی سی سی) دفتر میں ریاستی صدر دنیش گنڈوراؤ ، ضلع نگراں کاروزیر آر وی دیش پانڈے ، کانگریس ضلع صدر بھیمنا نائک کی موجودگی میں دوبارہ کانگریس میں شمولیت اختیار کی۔
جے ڈی نائک کانگریس کی ٹکٹ پر اور مجلس اصلاح و تنظیم بھٹکل کی حمایت سے دو مرتبہ بھٹکل حلقے سے رکن اسمبلی رہے ہیں، لیکن جب 2013کے ودھان سبھا انتخابات میں تنظیم نے ان کی حمایت نہیں کی تھی تو انہیں انتخابات میں شکست کا سامنا کرنا پڑا تھا اور آزاد امیدوار منکال وئیدیا کو جیت حاصل ہوئی تھی، جیت کے بعد جب منکال وئیدیا جب کانگریس میں شامل ہوئے تو جے ڈی نائک نے کانگریس سے دوری اختیار کرتے ہوئے بی جے پی میں شامل ہوگئے تھے۔ لیکن گزشتہ انتخابات میں جب انہیں بی جے پی سے ٹکٹ نہیں ملاتومایوس ہوکر بی جے پی سے ایک قدم باہر رکھاتھا، گزشتہ 6مہینوں سے ضلع بھر میں خبریں گردش کررہی تھیں کہ وہ کانگریس میں دوبارہ شامل ہوسکتے ہیں، اور ایسا ہی ہوا، انہوں نے لوک سبھا انتخابات کے اعلان سے قبل ہی کانگریس میں شمولیت اختیار کرلی۔ بتایا گیا ہے کہ اترکینرا پارلیمانی حلقےکے امیدواروں کی فہرست میں جے ڈی نائک کا بھی نام شامل ہے۔
کانگریس میں شامل ہونے کے بعد جے ڈی نائک نے کہاکہ کوئی آرزو یاکچھ اور لے کر کانگریس میں شامل نہیں ہواہوں، آئندہ پارلیمانی الیکشن میں حلقے سے کون امیدوار ہوگا پارٹی طئے کرے گی۔ البتہ انہوں نے اس بات کو واضح کیا کہ اننت کمار ہیگڈے کو شکست دینا ان کا اہم مقصد ہوگا۔