کوسموس اسپورٹس سنٹر بھٹکل کے زیراہتمام تعلیمی و تہنیتی ایوارڈ پروگرام کا شاندار انعقاد :وہی علم ،علم ہے جو اللہ سے جوڑے
بھٹکل :28؍فروری(ایس اؤ نیوز) کوسموس اسپورٹس سنٹر بھٹکل کے زیر اہتمام کوسموس تعلیمی و تہنیتی ایوارڈ کی تقریب بروز جمعرات کی رات 27فروری 2020کو مرکزی خلیفہ جماعت المسلمین بھٹکل کے قاضی مولانا خواجہ معین الدین اکرمی ندوی مدنی کی زیر سرپرستی خلیفہ محلہ میں کامیابی کے ساتھ منعقد ہوا۔
کوسموس اسپورٹس سنٹر کے صدر مولانا ارشاد نائطے ندوی کی صدارت میں منعقدہ تقریب میں ایس ایس ایل سی، پی یو سی ، ڈگری ، جامعہ وغیرہ سے امتیازی نمبرات سے کامیابی حاصل کرنے والے طلبا و طالبات کو مہمانوں کے ہاتھوں ایوارڈ سے نوازا گیا اور سنٹر کے سنئیر ممبران کی خدمات کا اعتراف کرتےہوئے ان کی تہنیت کی گئی ۔ تقریب میں مولانا خواجہ معین الدین اکرمی ندوی مدنی نے سنٹر کی خدمات کی ستائش کی اور ایوارڈ حاصل کرنے والے طلبا کو مبارکباد دینے کے بعد والدین سے مخاطب ہوتے ہوئے کہاکہ عشاء کے بعد بچوں کو گھر سے باہر جانے نہ دیں۔ کتنی بھی ضرورت کیوں نہ ہو۔ اگر والدین اتنا کام کریں تو خود محسوس کریں گے اپنے بچوں میں کیا کچھ تبدیلی ہوئی ہے۔ مولانا نے کہاکہ جو بچے اسکول اور علمی تیاری میں مصروف رہتےہیں وہیں اچھے نمبرات سے کامیا ب ہوتے ہیں۔
مہمان خصوصی کے طورپر قاضی جماعت المسلمین منکی مولانا شکیل احمد سکری ندوی نے خطاب کرتےہوئے کہاکہ جو اللہ کے احکامات کے پابندی کرتاہے ، عمل کرتاہے تو اللہ کی نصرت وتائید حاصل ہوتی ہے۔ زندگیوں میں تبدیلیوں اور انقلاب لانے کے لئے ضروری ہے کہ ہم اللہ کے نبی ﷺ کی سیرت پر عمل کریں۔ ہماری تعلیمی شرح میں اضافہ کی مزید ضرورت ہے ،جس مضمون کو بھی منتخب کریں اس میں تخصص کریں۔ وہی علم حاصل کریں جو ہمیں اللہ سے جوڑتاہے۔ بھٹکل بلاک ایجوکیشن آفیسر ایم آر منجی نے خطاب کرتےہوئےکوسموس اسپورٹس سنٹر کی خدمات کی ستائش کی اور کہاکہ انعامات سے نوازنا خاص کر علمی میدان میں انہیں اعزاز سے نواز تے ہوئے ترغیب دینا وقت کی ضرورت ہےجس پر میں سنٹر کو مبارکباد دیتاہوں۔
ڈائس پر مرکزی خلیفہ جماعت المسلمین بھٹکل کے صدر جعفر محتشم ، انجمن حامئی مسلمین بھٹکل کے جنرل سکریٹری صدیق اسماعیل ، مجلس اصلاح وتنظیم کے صدر ایس ایم سید پرویز احمد ، صدیقہ الیاس، عاطف ادیاور، حبیب اللہ اکرمی ، ضیاء اللہ شاہ بندری وغیرہ موجود تھے۔