بھٹکل 19/جون(ایس او نیوز) اتی کرم زمینوں کو سکرم کرنے کی درخواستوں کا ازسر نو جائزہ لینے کے سلسلے میں بات چیت اتی کرم ہوراٹا سمیتی کو ملاقات کا وقت دینے کے باوجود بھٹکل اسسٹنٹ کمشنر ساجد ملا کے دفتر میں موجود نہ رہنے پر وفد کے اراکین اپنی ناراضی اور برہمی کا اظہار کیا ہے۔

 موصولہ رپورٹ کے مطابق ہوراٹا سمیتی کے ضلعی صدر رویندرا ناتھ کی قیادت میں ایک وفد صبح 10.30بجے طے شدہ وقت پر اسسٹنٹ کمشنر کے دفتر پہنچا تووہاں پر اے سی ساجد ملا موجود نہیں تھے۔ دفتر کے افسران نے بتایاکہ اے سی صاحب اتی کرم داروں کا درخواستوں کا جائزہ لینے کے لئے ہوناور پہنچ گئے ہیں۔تعجب خیز بات یہ تھی کہ ہوناور کے اتی کرم داروں کو اے سی کی طرف سے بھٹکل پہنچنے کے لئے نوٹس جاری کیا گیا تھا۔اس موقع پر اسسٹنٹ کمشنر کے دفتر میں موجود افسران کے ساتھ وفد کے اراکین کی بحث و تکرار بھی ہوگئی۔

 وفد کے ذمہ داران کا کہناتھا کہ جنگلاتی زمین سکرم کرنے کی درخواستیں دے کر 12سال کا عرصہ گزرنے کے بعد بھی بھٹکل تعلقہ کے تلان اور بلال کھنڈ کے افراد کو انصاف نہیں ملا ہے۔اتی کرم کے تعلق سے افسران جو ثبوت فراہم کرنے کا مطالبہ کررہے ہیں وہ غیر قانونی ہے۔ اس تعلق سے گجرات ہائی کورٹ اور قبائلی معاملات کی وزات نے بالکل واضح کردیا ہے۔اس لئے افسران کو چاہیے کہ اتی کرم داروں کی درخواستوں کا قانون کے مطابق جائزہ لیں اور انہیں انصاف دلائیں۔اس کے علاوہ ریوینیو زمین سکرم کرنے کی کارروائی کو آگے بڑھایا جائے۔عوام کے ساتھ گفتگو کرکے ان کے مسائل حل کرنے کے بجائے افسران کا اس طرح چکمہ دے کر بھاگ نکلنے کی کوشش کرنادرست نہیں ہے۔

 اس موقع پر بھٹکل اتی کرم دار سمیتی کے صدر راما موگیر، ایف کے موگیر، رضوان، عبدالقیوم، منیر، دیوراج گونڈا، سلیمان اور دیگر بہت سارے اراکین موجود تھے۔