بھٹکل21/مئی (ایس او نیوز)  عید الفطر اور اس کی نماز کے تعلق سے موجودہ حالات میں قاضی صاحبان نے عوام کے لئے ہدایت جاری کرتے ہوئے کہا ہے کہ اس مرتبہ عید کی نمازگھر پر ہی ادا کی جائے۔

 اپنے ویڈیو پیغام میں مولانا خواجہ معین الدین اکرمی  مدنی (قاضی مرکزی خلیفہ جماعت المسلمین بھٹکل) نے کہا ہے کہ مولانا محمد اقبال ملا ندوی  (قاضی جماعت المسلمین بھٹکل) اور دونوں جماعت کے ذمہ داران کی مشترکہ نشست میں یہ بات طے کی گئی ہے کہ لاک ڈاؤن قوانین کا لحاظ کرتے ہوئے مسلمان اس مرتبہ عیدالفطر کی نماز اپنے اپنے گھروں میں ہی ادا کریں۔مولانا موصوف نے کہا کہ اس وقت دنیا ایک وبائی صورتحال سے گزر رہی ہے۔ سرکار کی طرف سے لاک ڈاؤن نافذ کیا گیا ہے۔ حفاظتی نقط  نظر سے آپسی میل ملاپ میں دوری قائم رکھنا ضروری ہے۔ایسے میں لوگوں کو گھروں میں عیدالفطر کی نمازادا کرنے کے ساتھ اللہ رب العالمین سے دعاکرنا چاہئے کہ اس  وبائی مرض سے تمام انسانوں کو چھٹکارا دے اور ساری انسانیت کو امن وامان عطا فرمائے۔ آپ نے مزید فرمایا ہے کہ اس مشکل گھڑی میں ہمیں ڈرنے اور خوف زدہ ہونے کی ضرورت نہیں ہے۔ یہ اللہ کی طرف سے ایک آزمائش ہے۔ اور ایسے مشکل حالات بہت دن تک باقی نہیں رہتے۔ اللہ تعالیٰ ہرمشکل کے بعد آسانی فراہم کیا کرتا ہے۔ ان شاء اللہ یہ مشکل وقت بھی بہت جلد ٹل جائے گااور ہم لوگ پھر ایک بار دوبارہ امن وسکون والی زندگی جی سکیں گے۔ تب تک حکومت کی طرف سے جو بھی قوانین لاگو کیے جارہے ہیں ان پر پوری طرح عمل کیاجائے اور اس بیماری سے چھٹکارا پانے کی کوشش کی جائے۔