بھٹکل: بیلنی میں ڈمپنگ یارڈ کی مخالفت کے بعد اسسٹنٹ کمشنر ممتادیوی کا بیلنی دورہ؛ مقامی لوگوں سمیت پنچایت اراکین سے کی ملاقات
بھٹکل 2/ستمبر(ایس او نیوز) ماون کوروے پنچایت حدود کے بیلنی میں ڈمپنگ یارڈ قائم کرنے کی سخت مخالفت کے بعد بھٹکل اسسٹنٹ کمشنر ممتادیوی نے تحصیلدار روی چندرا اور تعلقہ پنچایت ایکزی کوٹیو آفسر پربھاکر چکن منے کے ہمراہ بیلنی پہنچی اور متعلقہ جگہ کا معائنہ کرتے ہوئے مقامی لوگوں سے بات چیت کی۔
ماون کوروے پنچایت کے نائب صدر داسا نائک نے اسسٹنٹ کمشنر کو بتایا کہ ڈمپنگ یارڈ کے لئے یہ بالکل موضوع جگہ ہے، اور یہاں ڈمپنگ یارڈ قائم کرنے سے کسی بھی طرح کی گندگی پھیلنے کا خد شہ نہیں ہے کیونکہ کچروں کو مکمل طور پر نچوڑ دیا جائے گا جس سے قریبی ندی بھی آلودہ نہیں ہوگی۔ انہوں نے بتایا کہ ڈپٹی کمشنر نے ڈمپنگ یارڈ کے لئے 30 گُنٹہ زمین دی ہے ساتھ ساتھ ڈمپنگ یارڈ کے لئے فنڈ بھی منظور کی ہے اس لئے یہاں کام شروع کیا گیا ہے۔ ماون کوروے کی صدر سُمیترا گونڈا نے بھی اسی جگہ ڈمپنگ یارڈ قائم کرنے کی حامی بھری۔ یاد رہے کہ ان دونوں کا تعلق بی جے پی سے ہے۔
مقامی لوگوں بالخصوص منجوناتھ نائک، سری دھر نائک اور یوسف بیلّی نے اسسٹنٹ کمشنر کو بتایا کہ وہ اس زمین پر کسی بھی حال میں ڈمپنگ یارڈ قائم کرنے نہیں دیں گے، اور ضرورت پڑ ی تو راستوں پر نکل کر احتجاج کریں گے۔ منجوناتھ نائک نے اے سی کو بتایا کہ یہ پورا گنجان آباد ی والا علاقہ ہے اور پاس ہی ندی بھی بہتی ہے، اگر یہاں کچروں کی نکاسی کا مرکز بنایا جاتا ہے تو ظاہر بات ہے کہ پورا علاقہ متاثر ہوگا، بیماریاں پھیلیں گی اور ہم ہرگز یہاں ایسا کرنے نہیں دیں گے۔ اس دوران داسانائک اور منجوناتھ نائک کے درمیان کچھ دیر کے لئے لفظی جھڑپ چھڑ گئی، جب داسا نائک نے بتایا کہ یہاں ڈمپنگ یارڈ قائم کرنے سے علاقہ میں کسی طرح کی گندگی نہیں پھیلے گی اور ماحول میں کوئی تبدیلی واقع نہیں ہوگی تو منجوناتھ نائک نے سوال کیا کہ اگر آپ کو اس پروجکٹ میں کوئی نقصان نظر نہیں آتا تو پھر تالگوڈ میں قائم ہونے والے اس ڈمپنگ یارڈ کو یہاں بیلنی میں کیوں منتقل کیاگیا ؟ منجوناتھ نائک نے اے سی کو بتایا کہ اصل میں ڈمپنگ یارڈ کے لئے تالگوڈ میں جگہ منظور کی گئی تھی مگر وہاں کے عوام کی مخالفت کے بعداب اسے یہاں بیلنی میں قائم کرنے کی کوشش کی جارہی ہے، مگر ہم یہاں کسی بھی حال میں یہ منصوبہ بنانے نہیں دیں گے۔
اب یہ دیکھنا اہم ہوگا کہ اسسٹنٹ کمشنر ممتادیوی ڈمپنگ یارڈ کو لے کر کیا فیصلہ لیتی ہیں۔
