انجمن حامئی مسلمین بھٹکل ۔جشنِ صد سالہ کی تیاریاں زوروں پر۔3جنوری سے تقریبات کا آغاز ۔5جنوری کو ہوگا وزیراعلیٰ کمار سوامی کے ہاتھوں افتتاح
بھٹکل 2؍جنوری(ایس او نیوز)بھٹکل اور اطراف کے عام لوگوں کی تعلیمی ضرورت کو پوراکرنے کی نیت سے1919 ء میں قائم کیاگیا تعلیمی ادارہ انجمن حامئی مسلمین بھٹکل اب اپنے صد سالہ جشن کی تقریبات کا آغاز 3جنوری کو دوپہر میں ایک شاندار اور باوقار جلوس کی شکل میں کرنے جارہا ہے۔
گزشتہ ایک صدی سے علاقے کے عوام کی تعلیمی ضرورت پورا کرنے کے حوالے سے ان کی معاشی ترقی اور سیاسی بیداری کا سبب بننے والے اس مرکزی تعلیمی ادارے کی’ صدی تقریبات‘مختلف عنوانات کے تحت پورے سال چلیں گی۔انجمن کی تاریخ کا اجمالی جائزہ یہ بتاتا ہے کہ سماج میں تعلیم کو عام کرنے کے جذبے کے تحت جناب ایف اے حسن، ایم ایم صدیق اور آئی ایچ صدیق جیسے محسنین قوم نے اپنے ہم خیال احباب کے ساتھ مل کر اس ادارے کی بنیادرکھی تھی۔
صدسالہ جشن سے متعلق جانکاری دینے کے لئے منعقدہ اخباری کانفرنس سے خطاب کرتے ہوئے انجمن کے صدر جناب عبدالرحیم جوکاکو کا کہنا ہے کہ پرائمری اسکولی تعلیم سے شروع کیا جانے والا یہ ادارہ اب نرسری سے لے کرآرٹس ،سائنس اور کامرس کے علاوہ انجیئرنگ ٹیکنالوجی ،بزنس مینجمنٹ اور ٹیچرس ٹریننگ جیسے اعلیٰ شعبہ جات میں تعلیمی سہولیات فراہم کررہا ہے۔اوریہاں سے فارغ ہونے والے افراد مختلف ممالک میں مختلف شعبہ جات میں اعلیٰ عہدوں پر فائز ہیں۔یہ اس ادارے کے لئے قابل رشک بات ہے۔
انجمن کے جنرل سکریٹری جناب صدیق اسماعیل نے بتایا کہ 1919سے2019تک اپنے سو سال پورے کرنے پر ادارے کا جو جشن منایا جارہا ہے، اس سلسلے میں سال بھر مختلف تقریبات منعقد کی جائیں گی۔ ان تقریبات میں طلبہ کو اقدار پر مبنی تعلیم فراہم کرنے کے سلسلے میں عوام اور ماہرین سے رائے مشورے حاصل کیے جائیں گے۔ مفید اور معیاری تعلیم کی اہمیت کے تعلق سے بیداری لائی جائے گی۔ادارے کے انتظامی امور میں قابل ستائش خدمات انجام دینے والے اراکین، عملہ اور رینک حاصل کرنے والے طلبہ کی تہنیت کی جائے گی۔
صد سالہ تقریبات کمیٹی کے کنوینرجناب ایم جے عبدالرقیب نے بتایا کہ سال بھر میں جو پروگرام ہونگے اس میں خصوصی سیمینارس، تربیتی کارگاہ، نمائش، کھیل کود کے مقابلے اور دیگر تہذیبی و ثقافتی مجالس شامل رہیں گی۔
صد سالہ جشن کی میڈیا کمیٹی کے کنویرنر جناب محسن شاہبندری نے بتایا کہ تقریبات کا آغاز 3جنوری کی دوپہر کو انجمن آبادسے نکلنے والے جلوس سے ہوگا ۔ جو سلطانی محلہ، چوک بازار، محمد علی روڈ اور مین روڈ سے ہوتاہوا انجمن گراؤنڈ میں اختتام پزیر ہوگا۔5جنوری کو وزیراعلیٰ کرناٹکا کمارسوامی کی تشریف آوری ہوگی ۔ صبح نو بجے وزیر اعلیٰ جشن صد سالہ کا افتتاح کریں گے۔ اس موقع پر جامعہ اسلامیہ اشاعت العلوم کے صدر حضرت مولانا غلام محمد وستانوی بطور مہمان شریک اجلاس ہونگے۔اس کے علاوہ ضلع انچارج وزیر آر وی دیشپانڈے، وزیر جناب یوٹی قادر ، جناب ضمیر احمد خان، رکن اسمبلی سنیل نائک، وشویشورا ہیگڈے کاگیری، کانگریسی لیڈر اور سابق رکن اسمبلی منکال وئیدیا بھی مہمانان میں شامل رہیں گے، جبکہ اس اجلاس کی صدارت جناب عبدالرحیم جوکاکو، صدر انجمن کریں گے۔
5جنوری کی شب میں 8.30بجے کالج کے طلبہ ثقافتی پروگرام پیش کریں گے۔ اور 6جنوری کو صبح ۹ بجے سے صرف خواتین کے لئے مخصوص پروگرام منعقد کیا جائے گا۔اس پروگرام میں آل انڈیا مسلم پرسنل لاء بورڈ کی رکن فاطمہ مظفر، ڈاکٹر سویتا کامتھ، نسرین زہیر مہمانان خصوصی ہونگے۔انجمن گرلز ہائی اسکول کی فاونڈر ٹیچر محترمہ رابعہ عثمان حسن جوباپو اس اجلاس کی صدارت فرمائیں گی۔