کورونا سے اُڈپی میں مرنے والوں کی تعداد ہوگئی 6؛ بھٹکل میں بھی ایک شخص کی موت
بھٹکل 16 جولائی (ایس او نیوز) جمعرات کو اُڈپی میں مزید ایک شخص کی کورونا سے موت واقع ہونے کے بعد ضلع میں کورونا سے مرنے والوں کی تعداد بڑھ کر 6 ہوگئی ہے۔ اسی طرح بدھ کی شب کو بھٹکل میں بھی ایک شخص کی موت واقع ہونے کی خبر موصول ہوئی ہے جس کی رپورٹ آج جمعرات کو کورونا پوزیٹیو آنے کی اطلاع ملی ہے۔اس طرح بھٹکل میں بھی کورونا سے مرنے والوں کی تعداد بڑھ کر چھ ہوگئی ہے۔
اُڈپی سے ملی اطلاع کے مطابق 49 سالہ شخص اجّرکڈ سرکاری اسپتال میں ذیابطیس اور دیگر امراض کی وجہ سے داخل ہوا تھا، کورونا رپورٹ پوزیٹیو آنے کے بعد اسے بدھ کی شب کو اُڈپی کوویڈ اسپتال شفٹ کیا گیا تھا، مگر آج جمعرات کو اُس نے دم توڑ دیا۔ بتایا جارہا ہے کہ اس کی موت کوروناکی وجہ سے ہوئی ہے لیکن اُڈپی کے ڈسٹرکٹ ہیلتھ آفسر سُدھیرچندرا نے کورونا سے موت ہونے کی تصدیق نہیں کی ہے اور اسپتال سے تفصیلی رپورٹ موصول ہونے کے منتظر ہیں۔
ذرائع سے ملی اطلاع کے مطابق بھٹکل سرکاری اسپتال میں بھی گردے کی شکایت کو لے کر ایک 65 شخص کی موت واقع ہوئی ہے۔ بتایا گیا ہے کہ ڈیالیسس کرنے کی غرض سے وہ سرکاری اسپتال پہنچے تھے مگر رات کوہی ان کے انتقال کی خبر ملی ہے، بتایا گیا ہے کہ آج صبح ان کی بھی رپورٹ کورونا پوزیٹیو آئی ہے۔اس شخص کی موت کے ساتھ ہی بھٹکل سرکاری اسپتال کے ڈیالیسس سینٹر میں مرنے والوں کی تعداد بڑھ کر دو ہوگئی ہے۔ خبر ملی ہے کہ متعلقہ سینٹر سے ڈیالیسس کرنے والی مزید دو خواتین کی رپورٹ بھی پوزیٹو آئی ہے (خبر کی تصدیق ہونی باقی ہے) ۔
یاد رہے کہ گذشتہ 7 جولائی سے اب تک کورونا پوزیٹیو رپورٹ کے ساتھ مرنے والے بھٹکل کے لوگوں کی تعداد بڑھ کر چھ ہوگئی ہے۔
