ہوناور میں حادثے کا سبب بننے والے ڈرائیور کو 3 سال کی قید
ہوناور ،27 / ستمبر (ایس او نیوز) ہوناور تعلقہ کے اپونی گرام میں نیشنل ہائی وے 206 پر سال 2019 میں پیش آئے ایک سڑک حادثے کے ذمہ دار مال بردار رکشہ ڈرائیور کو عدالت نے تین سال اور 9 مہینے قید اور 7 ہزار روپے جرمانے کی سزا سنائی ہے ۔
ہوناور پولیس اسٹیشن کے حدود میں پیش آئے اس حادثے میں شیموگہ سے تعلق رکھنے والے سلمان خان نامی گوڈس رکشہ ڈرائیور نے ہوناور کی جانب سے اپنی موٹر بائک پر آنے والے راجیش گنپتی نائک کو ٹکر ماری تھی ۔ جس کے نتیجے میں راجیش بری طرح زخمی ہوگیا تھا اور اس کی موت واقع ہوئی تھی۔
اس حادثے کے تعلق سے ہوناور پولیس اسٹیشن میں کیس درج کیا گیا تھا ۔ اُس وقت کے اسسٹنٹ سب انسپکٹر گنیش ایچ نائک اور سرکل انسپکٹر چیلو راج بی نے تحقیقات کے بعد ہوناور کی عدالت میں چارج شیٹ داخل کی تھی ۔ گواہوں کے بیانات کی روشنی میں یہ بات سامنے آئی کہ گوڈس رکشہ ڈرائیور کی تیز رفتاری اور بے پروائی سے کی گئی ڈرائیونگ کی وجہ سے یہ حادثہ ہوا تھا ۔
سینئر سوِل اینڈ جے ایم ایف سی جج کمار جج نے کیس کی سماعت کے بعد ملزم کو قصوروار ٹھہراتے سزا سنائی ۔ سرکاری وکیل وینکٹیش کے نے استغاثہ کے لئے پیروی کی ۔