امسال ساحلی علاقے میں برسات کی قلت کا نتیجہ ؛ منگلورو تعلقہ کو 'قحط زدہ' قرار دیا گیا
منگلورو، 26 / اگست (ایس او نیوز) ہر سال زبردست بارش ہونے والے ساحلی علاقے میں امسال بارش کی شدید قلت کا سامنا ہے جس کی وجہ سے ریاست کے 113 تعلقہ جات کو 'قحط زدہ' گیا ہے جس میں جنوبی کینرا کا منگلورو تعلقہ بھی شامل ہے ۔
کرناٹکا اسٹیٹ نیچرل ڈسیاسٹر کے انچارج سینٹر نے یکم جون سے 19 اگست کے درمیان ریاست میں ہوئی برسات کی پیمائش کے پس منظر میں یہ اعداد و شمار جاری کیے گئے ہیں ۔
جنوبی کینرا کے منگلورو تعلقہ کے بارے میں کہا گیا ہے کہ اس عرصہ میں جتنی بارش ہونی چاہیے تھی اس میں تقریباً 20 فیصدکمی ہوئی ہے ۔ حالانکہ جنوبی کینرا کے دیگر تعلقہ جات میں بھی برسات کی قلت دیکھی گئی ہے مگر منگلورو تعلقہ میں تین ہفتوں سے زیادہ سوکھے موسم ، رطوبت کی کمی ، زیر زمین پانی کی سطح، ڈیمس کے اندر پانی بہانے والی ندیوں میں پانی کی کمی وغیرہ دیکھتے ہوئے اسے 'قحط زدہ' تعلقہ قرار دیا گیا ہے ۔
معلوم ہوا ہے کہ اس وقت جنوبی کینرا اور اڈپی ضلع کے 8 تعلقہ جات برسات کی کمی سے متاثر ہوئے ہیں ۔ سب سے زیادہ بارش کی قلت بیلتنگڈی (40 %) اورسولیا (39%) اور سب سے کم کنداپور (8%) اور کاپو(9%) تعلقہ جات میں دیکھی گئی ہے ۔
خیال رہے کہ چھ سال قبل بھی منگلورو اور بنٹوال تعلقہ جات کو ریاست کے 160 'قحط زدہ' علاقوں میں شامل کیا گیا تھا ۔ اعداد و شمار بتاتے ہیں کہ منگلورو میں ہر سال اوسطاً 310 ملی میٹر اور بنٹوال میں 337 ملی میٹر برسات ہوتی ہے ، لیکن اس مرتبہ منگلورو میں 75 ملی میٹر اور بنٹوال میں 91 ملی میٹر برسات ہوئی ہے ۔