ممبئی،4/اپریل(ایس او نیوز/ایجنسی)شیو سینا(یو بی ٹی)کے ایم پی سنجے راوت نے پیر کو الزام لگایا کہ بی جے پی ملک میں فسادات کی منصوبہ بندی اور اس کی سرپرستی کر رہی ہے اور اس نے پورے ہندوستان میں اس طرح کے فسادات کو بھڑکانے کیلئے ایک ونگ بھی قائم کی ہے- انڈین ایکسپریس کی رپورٹ کے مطابق راوت نے ممبئی میں میڈیا کے نمائندوں سے بات کرتے ہوئے الزام لگایا کہ ملک میں 2024تک فسادات کرانے کی سازش کی جارہی ہے، جب عام انتخابات ہوں گے، اور فسادات کا بہانہ بنا کر انتخابات کو ملتوی کر دیا جائے- شیو سینا(یو بی ٹی)نے اڈانی کے معاملے پر ہمت نہیں ہاری ہے-

سب جانتے ہیں کہ فسادی کون ہیں اور ملک میں فسادات کے پیچھے کون ہے- کل ہبلی میں ہونے والے فسادات کی سرپرستی کس نے کی؟ ہاوڑہ میں فسادات کون بھڑکا رہا ہے؟ مہاراشٹر میں فسادات کون بھڑکا رہا ہے؟ بھارتیہ جنتا پارٹی نے ایک نیا ونگ بنایا ہے- اس ونگ کے ذریعے فسادات کرائے گئے- ان کی پالیسی2024کے انتخابات سے پہلے ملک میں فسادات شروع کرنے اور پھر انتخابات کا سامنا کرنے یا انہیں ملتوی کرنے کی نظر آتی ہے-

ایم پی نے الزام لگایا کہ بنگال میں جو تشدد ہورہا ہے وہ بی جے پی کی سرپرستی میں ہے- یہ صرف لوک سبھا الیکشن جیتنے کیلئے کیا جا رہا ہے- کچھ سیٹوں کو نشانہ بنایا جا رہا ہے- کیا رام نومی تشدد کا باعث بن سکتی ہے؟ لیکن یہ اکثر کیا جاتا ہے- اس کے علاوہ، یہ صرف ان ریاستوں میں کیا جا رہا ہے جہاں انتخابات ہو رہے ہیں یا وہاں بی جے پی کی حکومت نہیں ہے- مہاراشٹر میں شنڈے-بی جے پی حکومت بہت کمزور حکومت ہے- اسی لیے یہاں فسادات کرائے جا رہے ہیں اس خوف سے کہ لوگ لوک سبھا انتخابات میں بی جے پی کو اقتدار سے باہر کر دیں گے-