ممبئی 12ڈسمبر(ایس او نیوز) مہاراشٹرا کے رائے گڑھ ضلع کے کھوپولی قصبے کے قریب ایک پہاڑی علاقے میں اتوار کی رات ایک بس الٹنے سے دو طالب علم ہلاک اور 47 دیگر زخمی ہو گئے۔ یہ طلباء لوناوالا میں پکنک منا کر واپس آرہے تھے۔ پولیس نے یہ اطلاع دی۔ ابتدائی طور پر ایسا معلوم ہوتا ہے کہ بریک فیل ہونے کی وجہ سے بس ڈرائیور نے گاڑی کا کنٹرول کھو دیا۔

ذرائع نے بتایا کہ یہ واقعہ اولڈ ممبئی - پونے ہائی وے پر 'میجک پوائنٹ' پہاڑی کے قریب، لوناوالا پہاڑی اسٹیشن سے تقریباً 14 کلومیٹر دور، رات 8 بجے کے قریب پیش آیا۔ ذرائع نے بتایا کہ پرائیویٹ بس میں مضافاتی چیمبور میں ایک کوچنگ کلاس کے 49 طلباء سوار تھے۔ انہوں نے کہا کہ یہ سب 10ویں جماعت کے طالب علم ہیں۔

ایک اہلکار نے بتایا، "بس ڈرائیور نے کھوپولی کے قریب گھاٹ (ہل روڈ) علاقے میں بریک فیل ہونے کی وجہ سے گاڑی پر کنٹرول کھو دیا جب طلباء لوناوالا (جو پونے ضلع میں واقع ہے) میں پکنک سے واپس آ رہے تھے۔" اہلکار نے بتایا کہ حادثے میں ڈرائیور سمیت تمام طلباء زخمی ہوئے ہیں جنہیں لوناوالا اور کھوپولی کے اسپتالوں میں لے جایا گیا ہے۔

اہلکار نے بتایا کہ 17 اور 16 سال کی عمر کے دو طالب علم، جو شدید زخمی تھے، اسپتال لے جانے تک فوت ہوگئے۔ ان کی شناخت چیمبور کیمپ کی رہنے والی ہتیکا کھنہ اور مضافاتی گھاٹ کوپر کے اسلفہ گاؤں کے رہنے والے راج راجیش مہاترے (16) کے طور پر کی گئی ہے۔ میڈیا ذرائع سے ملی اطلاع کے مطابق اسپتال میں داخل بعض طلبہ کی حالت نازک ہے۔

اعلیٰ پولس آفسر گوری مورے پاٹل نے اخبار نویسوں کو بتایا کہ حادثہ کے تعلق سے معاملہ درج کرلیا گیا ہے اور حادثے کی وجوہات کے تعلق سے چھان بین جاری ہے۔