ایرناکولم، 2 جولائی (ایس او نیوز): ریاست کیرالہ کے ایرناکولم میں انسانیت اور پیشہ ورانہ ذمہ داری کی ایک متاثر کن مثال اس وقت سامنے آئی جب شدید ٹریفک جام میں پھنسے ایک شخص کو اپنی کار میں اچانک دل کا دورہ پڑ گیا۔ قریب سے گزر رہی ایک بس میں سوار دو نرسوں نے فوری طور پر موقع پر پہنچ کر سی پی آر (CPR) دیا، جس کے نتیجے میں اس کی جان بچ گئی۔ یہ واقعہ ریاست کی اہم شاہراہ ایم سی روڈ (MC Road) پر پرومبور کے قریب پیش آیا۔
کیرالہ کی ملیالم میڈیا رپورٹ کے مطابق پرومبور کے رہائشی درمیانی عمر کے سِیناج اپنی کار چلا رہے تھے کہ ٹریفک جام کے دوران انہیں اچانک شدید سینے میں درد اٹھا اور وہ بے ہوش ہوگئے۔ ان کی گاڑی سڑک پر ہی رک گئی، جس سے وہاں موجود افراد میں کھلبلی مچ گئی۔ اسی دوران وہاں سے گزرنے والی ایک بس میں سوار دو نرسیں، آردرا (Aardra) اور انجلی (Anjali)، مقامی افراد کی درخواست پر فوراً بس سے اتر کر موقع پر پہنچیں۔ نبض چیک کرنے کے بعد انہوں نے اندازہ لگایا کہ مریض کو کارڈیک اریسٹ (Cardiac Arrest) ہوا ہے، جس پر انہوں نے فوری طور پر سی پی آر شروع کر دیا۔
عینی شاہدین کے مطابق دونوں نرسوں نے مسلسل چیسٹ کمپریشن (Chest Compressions) جاری رکھنے کے ساتھ ساتھ وہاں موجود افراد کو ایمبولینس طلب کرنے اور راستہ صاف رکھنے کی ہدایت بھی دی۔ چند منٹ بعد ایمبولینس پہنچنے پر مریض کو قریبی اسپتال منتقل کیا گیا، جہاں ڈاکٹروں نے بتایا کہ بروقت دی گئی سی پی آر کے باعث اس کی جان بچانا ممکن ہو سکا۔
ڈاکٹروں کے مطابق کارڈیک اریسٹ کی صورت میں ابتدائی چند منٹ انتہائی اہم ہوتے ہیں، اور اگر بروقت سی پی آر نہ دی جائے تو مریض کے بچنے کے امکانات بہت کم ہو جاتے ہیں۔
واقعہ کے بعد مقامی لوگوں نے دونوں نرسوں کی حاضر دماغی، جرات اور پیشہ ورانہ ذمہ داری کو سراہا، جبکہ سوشل میڈیا پر بھی ان کی تصاویر اور ویڈیوز تیزی سے وائرل ہوئیں اور صارفین نے انہیں "حقیقی ہیرو" قرار دیا۔ ماہرین صحت نے اس واقعہ کو بروقت سی پی آر کی اہمیت کی ایک بہترین مثال قرار دیتے ہوئے کہا کہ اگر عام شہریوں کو بھی اس کی بنیادی تربیت دی جائے تو ہنگامی حالات میں بے شمار جانیں بچائی جا سکتی ہیں۔