نئی دہلی، 26؍دسمبر (ایس او نیوز؍ایجنسی) محکمہ انصا ف نے ایک پارلیمانی پینل کو بتایا کہ سپریم کورٹ، ہائی کورٹ کے ججوں کی ریٹائرمنٹ کی عمر میں اضافہ نان پرفارمنگ ججوں کی مدت ملازمت میں توسیع کر سکتا ہے۔ انہوں نے بتایا کہ اگر سرکاری ملازمین بھی اسی طرح کا مطالبہ کرتے ہیں تو اس کا وسیع اثر ہو سکتا ہے۔

محکمہ انصاف نے یہ بھی کہا کہ سپریم کورٹ، ہائی کورٹ میں تقرریوں میں شفافیت اور احتساب کو یقینی بنانے کے اقدامات کے ساتھ ساتھ ججوں کی ریٹائرمنٹ کی عمر بڑھانے پر بھی غور کیا جائے گا۔ واضح کریں کہ وزیر قانون کرن رجیجو نے پارلیمنٹ کو بتایا تھا کہ سپریم کورٹ اور ہائی کورٹ کے ججوں کی ریٹائرمنٹ کی عمر بڑھانے کی کوئی تجویز نہیں ہے۔

محکمہ انصاف نے پارلیمانی کمیٹی برائے پرسنل، لا ء اینڈ جسٹس کے سامنے ایک پریزنٹیشن دی۔ اس کمیٹی کے سربراہ بی جے پی کے رکن پارلیمان اور بہار کے سابق نائب وزیر اعلیٰ سُشیل مودی ہیں۔ وزارت قانون و انصاف کے محکمے نے ایک پریزنٹیشن دی، جس میں عدالتی طریقہ کار اور اصلاحات کی تفصیلات شامل تھیں، جس میں ہائی کورٹ اور سپریم کورٹ کے ججوں کی ریٹائرمنٹ کی عمر میں اضافے کا امکان بھی شامل تھا۔اپنی پریزنٹیشن میں ڈیپارٹمنٹ نے کہا کہ ریٹائرمنٹ کی عمر میں اضافے سے کچھ نا اہل کیسز میں سروس کی توسیع کے حوالے سے فائدہ بڑھ سکتا ہے-

لیکن نان پرفارمنگ ججوں کی خدمات کو جاری رکھنا پڑ سکتا ہے۔ اس نے یہ بھی تجویز کیا کہ التوا کو کم کرنے اور عدلیہ میں شفافیت لانے کے ساتھ ساتھ ججوں کی ریٹائرمنٹ کی عمر پر بھی غور کیا جائے۔