بھٹکل 9/مارچ (ایس او نیوز)  ریاست کرناٹک کے ہاویری میں کانگریس صدر راہول گاندھی نے بی جے پی سرکار پر راست حملہ کرتے ہوئے  مودی کو چور قرار دیا۔  انہوں نے وزیراعظم مودی کو  مخاطب کرتے ہوئے سوال کیا کہ حال ہی میں جموں و کشمیر کے پلوامہ میں جو دہشت گردانہ حملہ ہوا تھااور جس  میں ہمارے چالیس سے زائد سی آر پی ایف کے جوان شہید ہوئے تھے،  ان کو کس نے مارا تھا؟  راہول نے پھر پوچھا کہ  جیش محمد کے چیف کا نام کیا ہے ؟ کیا جیش محمد کے چیف مسعود اظہر کو ہندوستانی جیل سے  بذریعہ کندھار  آپ کی سرکار نے نہیں چھڑایا  تھا ؟  مودی جی مجھے سمجھائے کہ  مسعود اظہر کو  پاکستان کے حوالے کس نے کیا تھا ؟ آپ دیش کے عوام کو بتائیں  کہ مسعود اظہر کو کس نے پکڑا تھا اور اُس کو چھڑا کر لے جانے والے لوگ کون تھے ؟

ملک کے وزیراعظم نریندر مودی پر زبردست وار کرتے ہوئے راہول گاندھی نے کہا کہ  ہم کانگریسی آپ کی طرح  دہشت گردی کے آگے جھکنے والے نہیں ہیں۔ہمارے جن جوانوں کو شہید کرایا گیا، اُن  دہشت گردوں کو آپ کی سرکار نے  کندھار ائرپورٹ لے جاکر چھوڑا تھا۔ 

راہول گاندھی نے  کہا کہ  گذشتہ لوک سبھا انتخابات کے موقع پر جب مودی خطاب کرنے آتے تھے تو  مودی صاحب جیسے ہی یہ کہتے تھے کہ  "اچھے دن۔۔۔۔" تو عوام جواب دیتی تھی کہ "۔۔۔ آنے والے ہیں"۔ مگر اب  پانچ سال کی سرکار چلانے کے بعد اگر کوئی عوام کے سامنے کہے کہ" چوکیدار....." تو سامنے سے جواب آتا ہے کہ " چور ہے "

راہول گاندھی نے مودی پر عوام کا پیسہ چرانے کا  الزام لگاتے ہوئے کہا  کہ مودی  عوام کی چوکیداری نہیں کررہے ہیں بلکہ  انل امبانی، ادانی،  میہول چوکسی، للت مودی جیسے پندرہ لوگوں کے چوکیدار بنے ہوئے  ہیں۔ راہول نے مودی کو للکارتے ہوئے کہا کہ  ا ٓپ دیش کو بتائیں کہ آپ نے رافیل ڈیل پر انل امبانی کو تیس ہزار کروڑ روپئے دیے یا نہیں دئے ؟ آپ نے 526 کروڑ کا  جہاز1600 کروڑ روپیوں میں  خریدا یا نہیں؟ آپ ائرفورس کے پائیلٹ کو بتائیں کہ آپ نے  ائرفورس کا پیسہ لے کر انل امبانی کو کیوں دیا ؟

راہول گاندھی نے مودی سے یہ بھی کہا کہ آپ ملک کے نوجوانوں کو سمجھائیں  کہ پانچ سال سے آپ  ایک کے بعد ایک  بھاشن دے رہے ہیں ،  لیکن ابھی تک نوجوانوں کو روزگار کیوں نہیں دے پائے۔ راہول گاندھی نے کہا کہ مودی جی نے چھوٹے دکانداروں کو ختم کردیا سال میں دو کرروڑ نوجوانوں کو روزگارہ دینے کا وعدہ کیا، لیکن  اب ملک کا حال یہ ہے کہ  اتنی زیادہ بے روزگاری بڑھ گئی کہ 45 سالوں کا ریکارڈ ٹو ٹ گیا، مودی کی حکومت میں بے روزگاری کی جو شرح بڑھی ہے، پہلے  ایسی بے روزگاری نہیں دیکھی گئی۔

راہول نے مودی کے  چین کے صدر کے ساتھ بات چیت کرنے کے دوران دوکھلام پر  چینی فوجیوں  کے ذریعے ہوئے حملہ پر بھی سوال اُٹھائے اور کہا کہ جب چینی فوج دوکلام پر قبضہ کررہی تھی، مودی جی چینی صدر کے ساتھ گجرات میں میٹنگ کررہے تھے۔ راہول نے کہا کہ  آج بھی دوکھلام پر چین نے قبضہ کررکھا ہے   اور مودی جی کچھ   نہیں کر پا رہے ہیں۔ 

راہول گاندھی نے کہا کہ ہماری سرکار نے جو وعدے کئے تھے، ہم نے پورے کئے، ہم نے اسمبلی انتخابات کے موقع پر وعدے کئے تھے کہ ہماری سرکار آتے ہی کسانوں کے قرضے معاف کریں گے، ہم نے  دو دنوں میں قرضہ معاف کردیا۔ 

راہول گاندھی نے اس بار لوک سبھا انتخابات میں کانگریس کو بھاری اکثریت سے جیت درج کرانے عوام سے اپیل کی اور کہا کہ مرکز میں اگر کانگریس سرکار آتی ہے تو ہر غریب شخص کو ہرماہ کم ازکم آمدنی  کا انتظام کرایا جائے گا۔ ہر غریب کے بینک کھاتے میں پیسے جمع کرائیں جائیں گے۔ راہول نے مزید کہا کہ اگر مودی انل امبانی، میہول چوکسی، للت مودی، ادانی ، وجئے مالیا جیسے لوگوں کو عوام کا ہزاروں کروڑ روپیہ  دے سکتے ہیں تو کانگریس سرکار غریب عوام کے کھاتے میں  ہرماہ کم ازکم آمدنی فراہم کرسکتی ہے۔

راہول گاندھی نے مزید کہا کہ نریندرمودی نے  عوام سے جھوٹے وعدے کئے اور عوام کو دھوکہ دیا۔ مگر کانگریس سرکار نے عوام سے جو بھی وعدئے کئے، ہمیشہ اُسے پورا کیا ہے۔ انہوں نے ہاویری سمیت ملک بھر کے عوام سے درخواست کی کہ اس بار  اُنہیں  مرکزمیں اقتدار کا موقع دے کر آزمائیں ۔

پروگرام میں کرناٹک کے سابق وزیراعلیٰ سدرامیا نے بھی خطاب کیا اور کہا کہ مودی نے کہا تھا کہ اچھے دن آنے والے ہیں، لیکن جب عوام نے اُنہیں اقتدار سونپا تو ملک میں صرف امبانی ، ادانی اور ان جیسے چند سرمایہ کاروں کے ہی اچھے دن آئے۔ انہوں نے نعرہ دیا کہ  ملک سے کانگریس کو جیت دلاو اور مودی کو ہٹاو۔