اننت کمارہیگڈے کو فون پر ملی جان سے مارنے کی دھمکی۔سرسی پولیس اسٹیشن میں شکایت درج
سرسی 23؍اپریل (ایس او نیوز) مرکزی وزیر برائے اسکل ڈیولپمنٹ اننت کمار ہیگڈے کو مبینہ طور پرکسی نے انجان نمبر سے فون کرکے جان سے مارنے کی دھمکی دی ، جس کے تعلق سے اننت کمار کے پرسنل اسسٹنٹ سریش شیٹی نے سرسی ٹاؤن پولیس اسٹیشن میں شکایت درج کروائی ہے۔
شکایت کنندہ کا کہنا ہے کہ 22اپریل اتوار کی رات کو 2.17بجے وزیر موصوف کے موبائل پر+404نمبر سے ایک کال آئی۔ مگرگہری نیند میں ہونے کی وجہ سے اننت کمار نے فون ریسیو نہیں کیا۔ پھر 2.20بجے گھر کے لینڈ لائن فون پر 0040440000سے کال آئی جسے وزیر موصوف کی بیوی شری روپانے ریسیو کیا۔ فون کرنے والے نے ہندی زبان میں ریسیو کرنے والی خاتون سے متعلق جانکاری پوچھی جس پر انہوں نے لائن کاٹ دی۔ اس کے بعددوبارہ لینڈ لائن پر اسی شخص کی طرف سے کال آئی اورجیسے ہی اننت کمار نے کال ریسیو کی تو فون کرنے والے نے گالی گلوچ کرنا شروع کیا اور پھر جان سے مار ڈالنے کی دھمکی دے کر فون لائن کاٹ دی۔
پولیس سے کی گئی شکایت میں سریش شیٹی نے کہا ہے کہ مرکزی وزیر کو جان سے مارنے کی دھمکیوں کے فون اکثر و بیشتر آتے رہتے ہیں۔اس لئے پولیس کو اس سلسلے میں گہری جانچ پڑتال اور مناسب اقدامات کرنا چاہیے۔
