اڈپی 11؍فروری (ایس او نیوز)ہیبری کے ماٹیبیٹو علاقے میں رہنے والی ایک خاتون نے اپنی بیماری سے تنگ آکر دومعصوم بچوں کے ساتھ زہر کھاکر خود کشی کرلی ہے۔

مہلوک خاتون کی شناخت دیپا(25سال) کے طور پر کی گئی ہے جو سنتوش نامی شخص کی بیوی تھی۔ ہلاک ہونے والے بچوں کے نام شیریا(9سال) اور پریا (6سال) بتائے جاتے ہیں۔دیپا کے بارے میں معلوم ہوا ہے کہ اس کے رحم میں کوئی خرابی پید اہوگئی تھی جس کی وجہ سے اس کے پیٹ میں اکثرناقابل برداشت درد ہواکرتا تھا۔اس کا سسر منجوناتھ شیموگہ کا رہنے والا تھا ، مگر وہ ہیبری کے ماٹیبیٹو میں پولٹری فارم چلارہا تھا۔ دیپا کا شوہر سنتوش اپنے والدین کے ساتھ ہی رہا کرتاتھا۔

کہا جاتا ہے کہ دیپا کو اپنا مرض ٹھیک ہونے کے آثار نظر نہیں آ رہے تھے اور اس کی وجہ سے وہ مایوس رہنے لگی تھی۔وہ سمجھ رہی تھی کہ جلد ہی اس کی موت ہوجائے گی اور پھر اس کے بعد اس کی دونوں معصوم بچیوں کی دیکھ ریکھ کرنے والا کوئی نہیں ہوگا۔ اس خیال سے9؍فروری کی شب میں اس نے کھانے کے اندر زہر ملادیا اور بچوں کو کھلانے کے ساتھ خود بھی زہر کھالیا۔

دیپا کے گھر والوں نے بہت ہی سنگین حالت میں اسے او راس کے بچوں کو اسپتال میں منتقل کیا جہاں علاج کارگر نہ ہونے پر10فروری کو صبح کے وقت پہلے دیپا نے دم توڑ دیا پھر تھوڑی دیر بعد دونوں بچوں کی بھی موت واقع ہوگئی۔بتایاجاتا ہے کہ دونوں بچے امریتا بھارتی ودیالیہ میں زیرتعلیم تھے۔ شیریاتیسری جماعت اورپریا ایل کے جی کی طالبہ تھی۔

ہیبری پولیس اسٹیشن میں کیس درج کرنے کے بعد لاشیں پوسٹ مارٹم کے لئے بھیج دی گئیں۔