اُڈپی میں کانگریسی کارکن کے گھرکے باہرسی سی کیمرہ لگانے پربی جے پی حامیوں کاحملہ
اُڈپی 7؍اگست ( ایس او نیوز) اپنے گھر کے اطراف سی سی ٹی وی کیمرے نصب کرنے کو لے کر بی جے پی کے حامیوں نے ایک کانگریسی کارکن پر حملہ کرنے کی واردات ضلع اُڈپی کے بڈانی ڈیور نامی مقام پر اتوار کی شب کو پیش آئی ہے۔
ذرائع سے ملی اطلاع کے مطابق کانگریسی کارکن سنیل ڈیسوزا (32سال) نے اپنے گھر کے اطراف رات کے وقت اوباش لوگوں کے جمع ہونے اور شراب نوشی و دیگر غیر قانونی سرگرمیوں سے تنگ آکر گزشتہ اسمبلی الیکشن کے موقع پر گھر کے باہری دروازے پر سی سی ٹی وی کیمرے لگادئے تھے۔ بتایا گیا ہے کہ اسی بات سے ناراض ہوکر کچھ بی جے پی کے حامیوں نے اس پر لوہے کی سلاخ سے حملہ دیا ، جس کے بعد اسے علاج کے لئے اسپتال میں داخل کیا گیا ہے۔
بتایا گیا ہے کہ علاقہ میں غیر قانونی سرگرمیوں اور شراب نوشی کے خلاف سنیل نے کئی بار اعتراض کیا تھا مگر ایک مخصوص تنظیم کے ممبروں نے اپنی یہ حرکتیں جاری رکھیں تو سنیل نے سی سی ٹی وی کیمرے لگادئے۔ اس پر مذکورہ تنظیم کے افراد نے سنیل کو اپنے گھر سے کیمرے ہٹادینے کے لئے کہا تھا، مگر اس نے ان کی بات نہیں مانی۔ مبینہ طور پر قریبی گرام پنچایت کے صدر اور بی جے پی لیڈر اُمیش پجاری کی ایماء پر دوافراد نے سنیل کے گھر پہنچ کر لوہے کی سلاخ سے اس پر حملہ کردیا۔ دونوں ملزمین کے نام سندیپ بتائے گئے ہیں۔حملے کے بعد سنیل کو اجرکاڈ اسپتال میں داخل کیا گیا ہے۔ سی سی ٹی وی فوٹیج میں حملے کا منظر ریکارڈ ہوا ہے۔سنیل کا کہنا ہے کہ حملے کے دوران اس کے گلے میں موجود 75ہزار روپے مالیت کی سونے کی چین گم ہوگئی ہے۔
ملپے پولیس اسٹیشن میں اس ضمن میں کیس درج کردیا گیا ہے اور پولس حملہ آوروں کی تلاش میں ہے۔