منگلورو 9؍فروری (ایس اونیوز)امسال 13جنوری کو علی الصبح گھر میں گھس کر بدنام زمانہ ٹارگیٹ گروپ کے غنڈے الیاس کو قتل کرنے کے الزام میں پانڈیشور پولیس اور سی سی بی ٹیم نے مشترکہ کارروائی کرتے ہوئے دو ملزمین کو گرفتار کرلیا ہے۔

پولیس کے بیان کے مطابق گرفتار ملزمین کے نام محمد سمیر عرف سمیر عرف رابرٹ(27سال) اورنمیر حمزہ(34سال) ہیں۔سمیر الال کا رہنے والا ہے جبکہ نمیر کاسرگوڈ کا رہائشی ہے۔سمیر پر ٹارگیٹ گروپ کے ایک اور رکن سرمہ عمران پر حملہ کرنے ، اس کے گھر پر توڑ پھوڑ مچانے کے علاوہ اسی گروپ کے مزید ایک رکن حمزہ اور اس کے گھر والوں پر حملہ کرنے کے معاملات الال پولیس اسٹیشن میں درج ہیں۔دوسرے ملزم نمیر حمزہ پرکوناجے پولیس اسٹیشن میں ایک قتل کی کوشش کا کیس درج ہے ، سورتکل پولیس میں ڈکیتی کا کیس اور منگلورو سٹی نارتھ پولیس اسٹیشن میں ڈکیتی کا کیس درج رہنے کے علاوہ الال پولیس اسٹیشن میں اغوا کا کیس بھی درج ہے۔