بنگلورو۔8؍اکتوبر(ایس او  نیوز) مسلسل ڈیزل کی قیمتوں میں اضافے کے سبب کے ایس آر ٹی سی اور بی ایم ٹی سی کو نقصانات کا سامنا کرنا پڑ رہا ہے، لہٰذا محکمۂ ٹرانسپورٹ بس کے کرایوں کی شرحوں میں اضافے سے متعلق کل منگل کو حتمی فیصلہ کرنے والا ہے۔ پچھلے کئی ماہ سے ڈیزل کی قیمتوں میں مسلسل اضافہ ہوتاجارہاہے۔ اور محکمۂ ٹرانسپورٹ بھاری نقصان اٹھارہاہے۔ اس کے باوجود وزیراعلیٰ کمار سوامی نے ٹکٹ کی شرحوں میں اضافہ نہ کرنے کی ہدایت دی ہے۔

ان کی ہدایت کے پیش نظر محکمۂ ٹرانسپورٹ نے ٹکٹ کی شرحوں میں اضافہ نہیں کیا ہے، لیکن لگتا ہے کہ اب بھاری نقصان کے پیش نظر دوسرا کوئی راستہ نہیں رہ گیا ہے۔ اس تعلق سے سرکاری سطح پر کل اجلاس منعقد کیا گیا ہے،جس میں حتمی فیصلہ کیا جائے گا۔ وزیر اعلیٰ کے رہائشی دفتر کرشنا میں کمار سوامی کی صدارت میں محکمۂ ٹرانسپورٹ کی ترقیاتی رپورٹ کا جائزہ لیا جائے گا۔ اجلاس میں وزیر ٹرانسپورٹ ڈی سی تمننا اور کے ایس آر ٹی سی کے سینئر افسر بھی شرکت کریں گے۔ پچھلے تین ماہ قبل ٹکٹ کی شرحوں میں 25 فیصد اضافہ کئے جانے کی تجویز محکمۂ ٹرانسپورٹ نے حکومت کو پیش کی تھی۔ لیکن حکومت نے اس کو منظور نہیں کیا۔ پچھلے ستمبر میں محکمۂ ٹرانسپورٹ نے ستمبر کے دوران ٹکٹ کی شرحوں میں 18 فیصد اضافے کا سرکیولر جاری کیا تھا،تاہم وزیراعلیٰ نے پٹرول اور ڈیزل پر سیس کم کرکے اضافے کو روک دیا تھا۔