بھٹکل میں چوری کی پھر واردات؛ زیورات اورنقد رقم نہیں ملی تو گھر کی چیزیں لے کر فرار
بھٹکل 7/اگست (ایس او نیوز) یہاں جامعہ آباد روڈ، ابوبکر مسجد کے قریب محترمہ فیروزہ رفیق کاکڑے کے مکان پر چوری کی واردات پیش آئی ہے جس میں چوروں نے گھر میں استعمال کی جانے والی چیزیں ٹی وی، اوون، جوسر، کپڑے، کوسمیٹکس وغیرہ پر ہاتھ صاف کرلیا ہے۔
گھر کی مالکن فیروزہ نے بتایا کہ وہ سنیچر شام کو گھر پر تالہ لگاکر بندرروڈ پر واقع اپنی والدہ کے گھر گئی تھی، آج پیر صبح قریب گیارہ بجے واپسی ہوئی تو یہ دیکھ کر حیران رہ گئی کہ لاک کئے گئے دونوں بیڈ روم کھلے ہوئے تھے، الماریوں کو توڑ کر کھولا گیا تھا، قیمتی کپڑے اور دیگر قیمتی کوسمیٹکس چیزیں غائب تھیں، ساتھ ساتھ ٹی وی، اوون، جوسر وغیرہ غائب تھیں۔ لگ بھگ 1.75 لاکھ مالیت کی چوری ہونے کا اندازہ لگایا گیا ہے۔
ڈائننگ روم میں واقع الماریوں کو بھی کھول کر قیمتی چیزیں چرائی گئی ہیں، البتہ چوروں کو گھر میں نقد رقم اور سونے کے زیورات وغیرہ نہیں مل سکے۔
گھر کے دروازوں کو اندرونی لاک سسٹم سے بند کیا گیا تھا، اس کے بائوجود چوروں نے گھر کے اندر رسائی حاصل کرتے ہوئے چوری کی واردات انجام دی ہے۔
اطلاع ملتے ہی بھٹکل مضافاتی پولس موقع پر پہنچی اور حالات کا جائزہ لیا۔ گھر کے ایک وینٹی لیٹر کی جالی کٹی ہوئی پائی گئی، جبکہ مکان کی چھت پر واقع دروازے کا تالہ ٹوٹا ہوا پایا گیا جس کو دیکھتے ہوئے پولس نے شبہ ظاہر کیا ہے کہ چوروں نے وینٹی لیٹر کی کھڑکی سے اندر داخل ہوئے ہیں، بعد میں چھت کے دروازے پر لگے تالے کو توڑ کر قیمتی چیزیں لے کر فرار ہوگئے ہیں۔
بتایا گیا ہے کہ گھر کی مالکن زیادہ تر بنگلور میں رہتی ہیں اور گھر ہمیشہ بند رہتا ہے، سنیچر کو ہی یہ لوگ بنگلور سے آئے تھے اور شام کو پھر گھر بند کرکے اپنی والدہ کے گھر چلے گئے تھے، اس بنا پر اس بات کا بھی شبہ ظاہر کیا جارہا ہے کہ سنیچر کو جب یہ لوگ گھر واپس آئے تھے تو موقع دیکھ کر چور اُسی وقت گھر کے اندر گھس کر کہیں چھپ گیا ہوگا، جیسے ہی شام کو ان لوگوں نے گھر کو پھربندکیا، اُسی کا فائدہ اُٹھا کر یہ واردات انجام دی گئی ہوگی۔
بہرحال پولس نے واقعے کے تعلق سے شکایت درج کرلی ہے۔ مزید چھان بین جاری ہے۔