مینگلور میں شوہر کا گلا گھونٹ کر قتل کرنے کے الزام میں بیوی کوعمر قید کی سزا
منگلورو 24/اگست (ایس او نیوز) بیلتھنگڈی تعلقہ کی رہنے والی پرشانتی (23 سال) نامی خاتون کو چیف ڈسٹرکٹ اینڈ سیشنس کورٹ نے عمر قید کی سزا سنائی ہے۔ پرشانتی پر الزام ہے اس نے سن 2014 میں اپنے شوہرہریش نائک (44 سال) کو نائیلون کی رسی سے گلا گھونٹ کر ہلاک کیا تھا۔عدالت میں الزام ثابت ہونے کے بعدجج نے پرشانتی کو عمر قید کی سزا سنائی ہے۔
ذرائع کے مطابق ہریش اور پرشانتی دونوں الگ الگ مذہبی طبقات سے تعلق رکھتے ہیں۔ ہریش نے سال 2012 میں پرشانتی کے عشق میں گرفتار ہوکر اس سے شادی رچائی تھی۔شادی کے بعد دونوں کرایے کے مکان میں رہنے لگے تھے۔ اس دوران ا ن کے یہاں ایک بیٹی بھی پیدا ہوئی تھی۔ایک دن پرشانتی آدھی رات کوتین بجے کے قریب ہریش کی بڑی بہن شارداکے گھر پہنچی اوربتایا کہ ہریش بڑی دیر سے گھر پہنچا اورسو گیاتھا، مگر اب وہ کسی بھی قسم کی حرکت نہیں کررہا ہے۔
خبر ملتے ہی پولیس سب انسپکٹر عبدالقادر نے اس وقت کیس کی تحقیقات کی اور پتہ چلایا کہ خود پرشانتی نے ہریش کو سوتے میں نائیلون کی رسی سے گلا گھونٹ کر ہلاک کیاتھا۔ چیف ڈسٹرکٹ اینڈ سیشنس جج کے سی بیلگی نے تمام شواہد اور وکیلوں کی بحث کو سامنے رکھتے ہوئے پرشانتی کو اپنے شوہر کے قتل کا مجرم قراردیا اور ایک لاکھ روپے ہرجانہ کے ساتھ عمر قید کی سزا سنائی۔ جج نے ہرجانہ کی رقم سے 98ہزار روپے ہریش اور پرشانتی کی ساڑھے تین سالہ بیٹی کے نام پر جمع کرنے کا حکم دیا اور بچی کو سی آر پی سی کی دفعہ 357Aکے تحت مزید معاوضہ پانے کا مستحق قرار دیا۔