مینگلور میں چودہ سالہ لڑکے کی تین منزلہ عمارت سے چھلانگ؛ بیلو وھیل گیم پر شبہ
مینگلور8/اکتوبر (ایس او نیوز) یہاں عدو مرولی نامی مقام پر ایک 14 سالہ طالب العلم نے سنیچر شام کو تین منزلہ عمارت سے کود کر خودکشی کرنے کی کوشش کی، جسے شدید زخمی حالت میں اسپتال میں داخل کیا گیا ہے۔ طالب العلم کی شناخت پراتم پدمانابھ کی حیثیت سے کی گئی ہے جو نویں جماعت میں زیرتعلیم ہے۔
بتایا گیا ہے کہ پڑوسی عمارت کی چھت پر چڑھ کر اُس نے چھلانگ لگائی اور چھلانگ لگانے سے قبل ایک نوٹ چھوڑا ہے کہ وہ تعلیم میں کافی کمزور ہے اس لئے وہ ایسا انتہائی قدم اُٹھارہا ہے، مگرعوام کو شک ہے کہ شاید اس نے بلو وھیل گیم کا چیلنج قبول کرتے ہوئے خودکشی کی کوشش کی ہے۔
اطلاع ملتے ہی پولس موقع پر پہنچ گئی اور چھان بین شروع کردی، پولس پراتم کے موبائل کی بھی جانچ کررہی ہے اور بلیو وھیل گیم کے چیلنج کرنے والے زاوئے سے بھی معاملے کو دیکھ رہی ہے۔ بتایا گیا ہے کہ گھروالوں اور پڑوس کے رہنے والوں نے اُسے ایک ہفتہ سے عمارت کی چھت پرجاکر چہل قدمی کرتے ہوئے دیکھا تھا، مگر کسی کے وہم و گمان میں بھی نہیں تھا کہ وہ ایسا انتہائی قدم اُٹھانے والا ہے۔
پراتم کو پرائیویٹ اسپتال میں داخل کیا گیا ہے، جہاں اُس کی حالت نازک بتائی گئی ہے۔
کنکنادی پولس نے معاملے کو درج کرتے ہوئے تفتیش میں جٹ گئی ہے۔