بھٹکل کے اُترکوپّا میں نابالغ لڑکی کی عصمت دری؛ ملزم فرار
بھٹکل 25/اگست (ایس او نیوز) تعلقہ اُترکوپّا میں ایک نابالغ لڑکی کی عصمت دری کئے جانے کی واردات پیش آنے کے بعد مرڈیشور پولس تھانہ میں پوکسو ایکٹ کے تحت معاملہ درج کیا گیا ہے، البتہ ملزم کے تعلق سے بتایا گیا ہے کہ وہ فرار ہوگیا ہے۔
ذرائع کے مطابق اُترکوپّا علاقہ کی 16 سالہ لڑکی کے ساتھ مبینہ طور پر سنتوش اینکا مراٹھی (23)کے پچھلے ایک سال سے جسمانی تعلقات قائم تھے، لڑکی کا بڑھتا پیٹ دیکھنے کے بعد پتہ چلا کہ لڑکی حاملہ ہے، لڑکی کے ساتھ پوچھ تاچھ کے بعد لڑکی نے سنتوش کا نام ظاہر کیا جس کے تعلق سے بتایا گیا ہے کہ وہ لڑکی کے بھائی کا دوست تھا،اور وہ اپنے دوست سے ملنے گھر آیا کرتا تھا جس کے دوران لڑکی کے ساتھ دوستی ہوگئی پھر تعلقات قائم ہوگئے۔
واقعے کی جانکاری ملتے ہی گھروالوں نے مرڈیشور پولس تھانہ پہنچ کر ملزم کے خلاف شکایت درج کی، جس کی بنیاد پر ملزم کے خلاف پوکسو ایکٹ کے تحت معاملہ درج کیا گیا ہے۔ پولس نے بتایا کہ معاملہ درج ہونے کی بھنک ملتے ہی ملزم فرار ہوگیا ہے۔
مرڈیشور پی ایس آئی ناگوّا معاملے کی مزید چھان بین کررہے ہیں۔