پناجی 2؍دسمبر (ایس او نیوز) گوا کے وزیر صحت وشواجیت رانے کے بیان کے مطابق مچھلیوں کو محفوظ رکھنے کے لئے مضر صحت کیمیکل فارمولین کے استعمال کی وجہ سے ریاست گوا نے پڑوسی ریاستوں سے مچھلی درآمد کرنے پر جو پابندی لگارکھی ہے اسے ہٹایا نہیں جائے گا اور ایف ڈی اے کی سند کے بغیر باہر سے مچھلیوں کی کھیپ کو گوا میں داخل ہونے نہیں دیا جائے گا۔

خیال رہے کہ کرناٹکا کے وزیرا علیٰ کمارا سوامی نے گواکے وزیراعلیٰ پاریکرسے تحریری اپیل کی تھی کہ بیرونی ریاستوں سے آنے والی مچھلیوں پر سے پابندی ہٹادی جائے تاکہ مچھیروں اور مچھلی کے کاروباریوں کو راحت مل سکے اور انہیں ایف ڈی اے قانون کے مطابق رجسٹریشن کے ساتھ مچھلیوں کی درآمد کے لئے کچھ عرصے کی مہلت دی جائے۔لیکن وشواجیت رانے نے وضاحتی بیان جاری کرتے ہوئے کہا کہ’’ حکومت گوا نے مچھلیوں کی درآمد پر پابندی نہیں لگائی ہے بلکہ یہ حکم نامہ گواکی عوامی صحت کو دھیان میں رکھتے ہوئے کی گئی ایک کارروائی ہے۔مجھے کرناٹکا کے وزیراعلیٰ کی طرف سے مکتوب موصول ہواہے مگرجب تک قانونی تقاضے پورے نہیں کیے جاتے اس وقت تک گوا میں بیرونی ریاستوں سے درآمد کی جانے والی مچھلیوں پر پابندی جاری رہے گی۔