ممبئی ریلوے اسٹیشن پربھگڈر میں ہلاک ہونے والوں میں جنوبی کینرا کی 2خواتین بھی شامل
منگلورو یکم اکتوبر(ایس او نیوز) جمعہ کے دن ممبئی کے ایلفیسٹن ریلوے پل پر مچی بھگڈر میں ہلاک ہونے والوں میں جنوبی کینرا ضلع کی 2خواتین بھی شامل ہیں۔ ایسے میں ممبئی حادثے میں ایک زخمی شخص کے ہلاک ہونے کی اطلاع موصول ہوئی ہے ، جس کے ساتھ ہی بھگڈر میں مرنے والوں کی تعداد اب بڑھ کر 23 ہوگئی ہے۔
مینگلور کی جو دو خواتین اس حادثے میں ہلاک ہوئیں ہیں، اُن کی شناخت سجاتا پی آلوا( ۴۲سال) اور سوم لتا شیٹی (۴۵سال) کی حیثیت سے کی گئی ہے۔
بتایا گیا ہے کہ ایک زمانے سے ان دونوں کے خاندان ممبئی میں ہی قیام پزیر ہیں۔ سجاتا اور سوم لتا کے بارے میں بتایا جاتا ہے کہ وہ کرلا بھانڈوپ بنٹ کمیٹی کی بہت ہی فعال اور متحرک کارکن تھیں۔سجاتا بنیادی طور پر جنوبی کینرا کے وامنجور کی رہنے والی تھیں۔سماجی خدمات کے علاوہ ڈراموں میں اداکاری اس کا محبوب مشغلہ تھا۔ اس کے شوہر پرشوتم آلواکے بارے میں پتہ چلا ہے کہ وہ کہ انکم ٹیکس ڈپارٹمنٹ میں افیسر ہے۔جبکہ سوم لتا ایک کھلاڑی تھی اور بنٹ کمیونٹی کی طرف سے ہونے والے کھیل کود کے مقابلوں کی نگرانی کیا کرتی تھیں۔اس کے شوہر چندر شیکھر شیٹی کے بارے میں پتہ چلا ہے کہ وہ سیمنس کمپنی میں ملازم ہے۔