منگلورو30؍جنوری (ایس او نیوز) جب دیپک راؤ اور عبدالبشیر پر دوالگ الگ مقامات پر شرپسندوں نے جان لیوا حملے کیے تھے تو اس وقت ان کو اسپتال پہنچاکر ان کی جان بچانے کی کوشش کرنے والے عبدالمجید اور شیکھرکولال دونوں ایک دوسرے سے مختلف مذہب والے تھے، مگر انسانیت کے جذبے کا جومظاہرہ انہوں نے کیا تھا اس کے لئے میڈیامیں ان دونوں کی بہت ستائش کی گئی تھی۔

اب منگلورو سے ملنے والی تازہ جانکاری کے مطابق کلبرگی(گلبرگہ) کے ایک ایڈوکیٹ نے ان دونوں کو اپنی طرف سے انعام دیتے ہوئے ان کی سراہنا کی ہے۔ بتایاجاتا ہے کہ کلبرگی کے مقیم ایڈوکیٹ پی ولاس کمار نے جنوبی کینرا ضلع انتظامیہ کی معرفت سے دیپک کو بچانے کی کوشش کرنے والے عبدالمجید اور عبدالبشیر کی جان بچانے کی کوشش کرنے والے شیکھرکولا ل کو فی کس پچاس ہزار روپے کے چیکس اور ستائش نامے عطا کیے۔ اپنی مصروفیت کے باعث خود اپنے ہاتھوں سے چیک دینے کے لئے وہ منگلورو میں موجود نہیں تھے۔ اس لئے ایڈیشنل ڈی سی کمار اورڈپٹی کمشنر آف پولیس (لاء اینڈ آرڈر) پی ہنومنتھ رایا کے ہاتھوں ڈی سی کے دفتر میںیہ چیکس متعلقہ افراد کو دئے گئے۔

اس موقع پر ایڈیشنل ڈی سی نے کہا ان دو افراد نے مختلف مذاہب سے تعلق رکھنے والے زخمیوں کی جان بچانے کی کوشش کرتے ہوئے انسانیت کا صحیح روپ دکھایا تھا۔ اور ان کے اس جذبے کی قدر اور ستائش کے لئے ایڈوکیٹ ولاس کمار نے اپنی جیب سے اس انعام کی رقم روانہ کی ہے۔ جبکہ چیک موصول ہونے پر عبدالمجید نے کہا کہ چونکہ ہم ان زخمیوں کی جان بچانے میں کامیاب نہیں ہوئے ، اس لئے ہمیں اس انعام کی ضرورت نہیں تھی۔ ڈی سی پی ہنومنتھ رایانے کہا کہ جو لوگ عبدالبشیر اور دیپک راؤ جیسے معاملے میں ا نسانیت دکھانے اور زخمیوں کی مدد کرنے کے لئے آگے بڑھیں گے ان کا ہر طرح سے تحفظ کیا جائے گا اور پولیس کی طرف سے ان سے سوالات نہیں کیے جائیں گے۔

ایڈوکیٹ ولاس کمار نے اپنے اخباری بیان میں کہا ہے کہ’’ عبدالمجید اور شیکھر نے حقیقی سیکیولرازم اور انسانیت کا مظاہرہ کیا ہے۔اس کے علاوہ حالات کو دانشمندی کے ساتھ سنبھالنے پر ریاستی حکومت بھی لائق ستائش ہے۔‘‘