اڈپی20دسمبر (ایس او نیوز) آل انڈیا بینک آفیسرس کنفڈریشن (AIBOC)کے بینر تلے بینک ملازمین نے اپنے مختلف مطالبات منوانے کے لئے 21 دسمبر کو ملک گیر پیمانے پر ہڑتال پر جانے کا فیصلہ کیا ہے۔ اس بات کی اطلاع سنڈیکیٹ بینک آفیسرس ایسو سی ایشن کے نیشنل صدر یو ششی دھر شیٹی نے دی ہے۔

پریس کانفرنس سے خطاب کرتے ہوئے ششی دھر شیٹی نے بتایا کہ ہڑتال پرجانے والے ملازمین کے مطالبات میں ملک بھر میں بینک افسران پر ہونے والے حملے، طبی سہولتوں میں کی گئی یکطرفہ کٹوتی، تنخواہوں اور دیگر مراعات، کے مسائل کا فوری حل نکالنا، مؤظف افسران کی پنشن پر نظر ثانی، پنشن کی نئی پالیسی کو منسوخ کرنا وغیرہ شامل ہیں۔اس کے علاوہ اس ہڑتال کے مقاصد میں بینک آف بروڈا، وجیا بینک اور دینا بینک وغیرہ کو ضم کردینے کے خلاف احتجاج بھی شامل ہے۔

پریس کانفرنس کے موقع پر ایسو سی ایشن کے دیگر عہدیدار شنکر کنداپور، اویناش ہیگڈے، دنیش پائی اور اروند شیٹی موجود تھے۔