بھٹکل میں بجلی گرنے سے ایک عورت جاں بحق، دو زخمی
بھٹکل 15/مئی (ایس او نیوز) آج صبح کی اولین ساعتوں میں گرجدار آوازوں کے ساتھ بجلیاں گرنے اور موسلادھار بارش شروع ہونے کے ساتھ ہی ایک مکان پر بجلی گرنے سے مکان میں موجود ایک خاتون جاں بحق ہوگئی، جبکہ اسی مکان کے دو افراد زخمی ہوگئے۔
مرنے والی خاتون کی شناخت بی بی صفیہ بنت آمان اللہ خان (22) کی حیثیت سے کی گئی ہے۔
حادثہ اُس وقت پیش آیا جب صبح قریب پانچ بجے گرجدار آوازوں کے ساتھ بجلیاں گرنے لگیں، آمان اللہ خان نے بتایا کہ رات سے الیکٹری سٹی نہ ہونے سے وہ گھر کے باہر ہی سورہے تھے، پانچ بجے جب بجلیاں گرنے لگیں تو انہوں نے اندر جاکر دروازہ بند کرلیا، اسی دوران صبح قریب ساڑھے پانچ بجے ایک ایسی خطرناک بجلی لپکی کہ پورا مکان اُس کی لپیٹ میں آگیا۔ بجلی گرنے سے اس کی دُختر نے موقع پر ہی دم توڑ دیا، جبکہ ان کا بیٹا مبارک خان اور پوتا محمد کیف کو بجلی کے جھٹکے لگنے سے چوٹ پہنچی۔
بجلی گرنے سے گھر کے کئی کھپریل اُڑ گئے ، الیکٹرک میٹر جل کر تباہ ہوگیا جبکہ گھرکی ایک دیوار پر تین سوراخ پڑ گئے ساتھ ساتھ گھر کے پچھواڑے کے داخلی دروازے پر سمینٹ اُکھڑ گئی ۔
بتایا گیا ہے کہ بی بی صفیہ کی آٹھ ماہ قبل ہی شکاری پور (شموگہ ضلع) کے ذاکر سے شادی ہوئی تھی اور وہ اپنے شوہر کے ساتھ ہی رہتی تھی، دو روز قبل یعنی سنیچر کو ہی یہ دونوں بھٹکل آئے تھے اور کل اتوار کو شوہر اپنی بیوی کو بھٹکل چھوڑ کر دو دن بعد واپس آنے کی بات کہہ کر چلا گیا تھا، مگر کسے پتہ تھا کہ دراصل موت اُسے بھٹکل کھینچ لائی ہے۔ گھروالوں نے بتایا کہ صفیہ ڈیڑھ ماہ کی حاملہ تھی۔
بجلی گرنے سے بی بی صفیہ کا بایاں حصہ جل گیا ہے، جس کے نشان بدن پر دیکھے گئے ہیں، ساتھ ساتھ اُس حصہ کا کپڑ ا بھی جل گیا ہے۔
خاتون کی موت واقع ہونے کی اطلاع ملتے ہی پاس پڑوس کے کافی لوگ گھر کے باہر جمع ہوگئے۔ اللہ اس خاتون کی مغفرت فرمائے اور گھروالوں کو صبر جمیل عطا فرمائے، اٰمین
