کمٹہ بند اور پولس کی اجازت کے بغیر بائک ریلی کا شاخسانہ؛ 11سے زائد افراد کے خلاف معاملہ درج
کمٹہ:20/مارچ(ایس اؤ نیوز) مسلم نوجوان پر حملہ کرنے کے معاملے میں کیس درج کرنے کی مخالفت میں ہندو شدت پسند تنظیموں کی جانب سے سنیچر کو کمٹہ بند کا اعلان کرنے اور پولس کی اجازت کے بغیر بائک ریلی کا اہتمام کرنے پر پولس نے 11 سے زائد لوگوں پر معاملہ درج کرلیا ہے۔
خیال رہے کہ شدت پسند تنظیموں کے 100سے زائد کارکنوں نے سنیچر کو بائک ریلی کی تھی، ریلی کو روکنے کی پولس نے کوشش بھی کی لیکن ہندو تنظیموں کے کارکنوں نے پولس کو ٹھینگا دکھاتے ہوئے سینہ تان کر شہر میں بائک ریلی کی تھی۔ پولس کی اجازت کے بغیر ریلی نکالنے پر اب ریلی کی قیادت کرنے والے سنپت کمار نائر، وشوناتھ نائک، گنیش بھٹ، شری دھر انکولیکر، سبرامنیا اڈدنگی ، دتاتریہ نائک، پرشانت نائک، سوکمار نائک، روی نائک ، ستیش چنداور، سورج نائک اور دیگر افراد کے خلاف کیس درج کرلیا ہے۔
یاد رہے کہ جمعہ کی شام کو ایک مسلم نوجوان پر حملہ کرکے اُس کی بری طرح پیٹائی کرنے کے بعدشرپسندوں نےاسے پولس کے حوالے کردیا تھا اور الزام عائد کیا تھا کہ اس نوجوان نے رام رتھ نامی مذہبی جلوس کو گھور کر دیکھا تھا اور جلوس میں شامل لوگوں کو چپل دکھایا تھا۔ پولس نے حُذیف نامی نوجوان کو اُسی وقت گرفتار کرلیا تھا، اس معاملے میں حُذیف اور اُس کے گھروالوں نے حذیف پر حملہ کرنے والوں کے خلاف بھی معاملہ درج کیا تھا، اور حملہ آوروں کو گرفتار کرنے اور اُن کے خلاف قانونی کاروائی کرنے کا مطالبہ کیا تھا۔ اس تعلق سے جب پولس نے حُذیف پر حملہ کرنے والوں کے خلاف بھی معاملہ درج کیا تو ہندوشدت پسند تنظیموں کے کارکنوں نے سنیچر کو کمٹہ بند کا اعلان کیا تھا۔