کرناٹکا کے کولار میں اسکول کی دیوار گرنے سے ساتویں جماعت کی طالبہ فوت
کولار 19؍دسمبر(ایس او نیوز) کولار ضلع کے ملباگل تعلق میں آنے والے گنا گنٹے پالیہ سرکل میں واقع مرارجی دیسائی اقامتی اسکول کے احاطے میں بیت الخلاء کی دیوار گرنے کے نتیجے میں ایک ساتویں جماعت کی طالبہ کی موت واقع ہوگئی۔ مہلوک کی شناخت جوسنا کی حیثیت سے کی گئی ہے۔
بتایا گیا ہے کہ محکمۂ سماجی بہبود کے تحت آنے والے اسکول سے متصل بیت الخلاء کی دیوار صبح اُس وقت گرگئی جب تیرہ سالہ طالبہ واش روم میں تھی ۔ ذرائع کے مطابق یہ بچی قریب ہی واقع بین ہلی کی ساکن تھی۔ حکام نے بتایاکہ اسکول کی عمارت کا گھٹیا معیار دیوار کے منہدم ہونے کا سبب بنا۔ اسکول کی مستقل عمارت قریب میں ہی تعمیر ہورہی تھی، اسی لئے عارضی عمارت میں اسکول چلایا جارہا تھا۔ فوری طور پر ڈپٹی کمشنر جے منجوناتھ اور تحصیلدار پروین نے دورہ کیا ۔
اسکول پرنسپال بھارتی نے بتایا کہ اسکول میں جملہ 162 بچے تعلیم حاصل کرتے ہیں، اسکول پہلے ملباگل کے دیورایا سمودرا کیمپس میں تھا، اسی سال 7 جولائی کو نیتاجی نگر میں ارشاد نامی ملکیت کی عمارت میں منتقل کیا گیا تھا۔
حادثے کے فوری بعد فائر بریگیڈ سمیت پولس اور مقامی عوام کثیر تعدا میں جائے وقوع پر پہنچ گئے اور ملبہ ہٹانے کا کام شروع کیا۔
ملباگل پولیس تھانے میں معاملہ درج کرلیا گیا ہے۔
