یلاپور ندی میں بہہ جانے والے ٹیکسی ڈرائیورکا ابھی تک پتہ نہیں چلا؛ ضلعی انتظامیہ نے کیا نیوی کی مدد لینے کا فیصلہ
یلاپور 28؍جون (ایس او نیوز)یلاپور تعلقہ کے گنیش پال نامی علاقے میں سیاحت کے لئے آنے والے ٹیکسی ڈرائیورمحمد رفیق کا ابھی تک کوئی پتہ نہیں چلا ہے ، جو شالملا ندی کی تیز لہروں میں بہہ گیا تھا۔
بتایا گیا ہے کہ ہاویری سے تعلق رکھنے والا ٹیکسی ڈرائیور محمد رفیق (۳۱سال) دیگر 19افراد کے ساتھ اتوار کے روز صبح گنیش پال آیا تھا۔ چونکہ ڈیم کے اس پار پانی جمع ہونے کے علاقے میں تیز بارش کی وجہ سے ندی میں پانی کا بہاؤ بہت تیز ہوگیا تھا۔لیکن رفیق اس کا اندازہ لگانے میں ناکام رہا اور وہ تیرنے کے لئے ندی میں اتر گیا۔ مگر لہروں کی تیزی کے سامنے وہ ٹک نہیں پایا اور دیکھتے ہی دیکھتے پانی اسے بہا لے گیا۔کافی تلاش کے باوجود اس کاکہیں بھی پتہ نہیں لگ سکا۔
سرکاری افسران کاکہنا ہے کہ ندی میں پانی بہت ہی خطرناک حد تک تیزی سے بہہ رہا ہے ایسے میں اگر کوئی اس میں غرق ہوتا ہے تو پھر وہ گہرائی میں موجود بڑے بڑے پتھروں میں بھی پھنسنے کے امکانات ہیں۔
انچارج ضلع ڈپٹی کمشنر ایل چندرا شیکھر نائک نے بتایا کہ تین دن گزرنے کے بعدبھی رفیق کا کوئی پتہ نہ چلنے کی وجہ سے فیصلہ کیا گیا ہے کہ کاروار سے نیوی کے ماہر غوطہ خوروں کی مدد لی جائے۔ اس سلسلے میں وہ بحری اڈے کے افسران سے غوطہ خوروں کو بھیجنے کی درخواست کررہے ہیں۔ یلاپور سرکل پولیس انسپکٹرنے بتایا کہ اتوار کی شام سے ہی ہم یہاں موقع پر موجود ہیں۔ ندی میں پانی کی سطح ابھی تک کم نہیں ہوئی ہے۔ ایسے میں تلاشی کے لئے ندی میں اترنا بھی بہت زیادہ خطرے کی بات ہے۔ہم نے پورے علاقے میں گاؤں والوں کو الرٹ کردیا ہے کہ اگر کہیں بھی کوئی سراغ ملے تو اس کی اطلاع دی جائے۔بدھ کی شام تک محمد رفیق کا کہیں بھی پتہ نہیں چل پایا تھا۔