کمٹہ میں پہاڑی کھسکنے کے متاثرین کو اضافی معاوضہ دینے، دیشپانڈے کا آئی آر بی سے مطالبہ
کمٹہ13؍جون (ایس او نیوز) نیشنل ہائی وے کی توسیع کے پس منظر میں کی گئی پہاڑیوں کی کٹائی اورکھدائی نے مختلف مقامات پر عوام کے لئے پریشانیاں کھڑی کر دی ہیں۔
حال ہی کمٹہ میں پہاڑی کھسکنے کا جو حادثہ پیش آیا تھا اس میں سات افراد زخمی اور تین بچے ہلاک ہوگئے تھے۔اس ضمن میں ضلع ا نچارج وزیر مسٹر آروی دیشپانڈے نے ریاستی حکومت کی طرف سے متاثر ین کو معاوضہ ادا کرنے کا اعلان کیا تھا۔ اب وزیر موصوف نے بتایا ہے کہ انہوں نے نیشنل ہائی وے توسیعی منصوبے کی ٹھیکیدار کمپنی آئی آر بی کوبھی ہدایت دی ہے کہ وہ ہلاک ہونے والوں کے خاندان اور متاثرین کو اضافی امداد فراہم کرے۔انہوں نے کہاہے کہ اس حادثے میں ہلاک ہونے والوں کو ریاستی حکومت کی طرف سے فی کس 4لاکھ روپے معاوضہ دینے کے اقدامات کیے گئے ہیں۔زخمیوں کو فی الحال سرکاری خرچ پر علاج فراہم کیا جارہا ہے، اور انہیں بھی مناسب معاوضہ دینے کی کارروائی کی جارہی ہے۔اس کے علاوہ جن کے مکانات کو نقصان پہنچا ہے اس کا بھی سروے کیا جارہا ہے اور انہیں بھرپور معاوضہ فراہم کرنے کی ہدایت ضلع ڈپٹی کمشنر کو دی گئی ہے۔
وزیر موصوف نے ٹھیکیدار کمپنی کے ذمہ داروں کو ہدایت دی ہے کہ شاہراہ کے توسیعی کام کے نتیجے میں آئندہ کہیں بھی اس طرح کے حادثات نہ ہوں اس سلسلے میں پوری احتیاط سے کام لیا جائے۔اور جہاں کہیں بھی پہاڑی کھسکنے کے امکانات ہیں، اس کو روکنے کے اقدامات پہلے سے ہی کرلیے جائیں۔
