مختلف مذاہب سے تعلق رکھنے والی جوڑی کو بجرنگ دل کارکنان نے کیا پولیس کے حوالے
منگلورو،12؍جنوری (ایس او نیوز) ایک مسلم لڑکے اور ایک غیر مسلم لڑکی کو ساتھ میں گھومتا پھرتا دیکھ کر بجرنگ دل کے کارکنان کی طرف سے انہیں گھیر لینے اور پھر پولیس کے حوالے کرنے کا واقعہ سورتکل کے کولائی کاوینا کلّو میں پیش آیا ہے۔
موصولہ رپورٹ کے مطابق تھوٹا بینگرے کا رہنے والا صفوان(20سال) کولائی کاوینا کلّو میں اپنے رشتے دار کے گھر دوپہر کے وقت منگلا دیوی علاقے کی رہنے والی ایک نوجوان غیر مسلم لڑکی کے ساتھ آیا ہوا تھا۔جب بجرنگ دل کے کارکنان کو موٹر بائک پر غیر مسلم لڑکی کے ساتھ صفوان کے آنے کی بھنک لگی توان لوگوں نے اس مکان پر پہنچ کر اس جوڑی کو گھیر لیا اور تفتیش کرنے لگے۔ جب یہ جوڑی تشفی بخش جواب دینے میں ناکام رہی تو پھر بجرنگ دل کے کارکنان نے پولیس کو طلب کیا اور قانونی کارروائی کا مطالبہ کرتے ہوئے ان دونوں کو پولیس کے حوالے کیا۔
لڑکے اور لڑکی کو پولیس اسٹیشن لانے کے بعد تفتیش سے پتہ چلا ہے کہ مذکورہ لڑکی اور صفوان ایک مال میں ملازمت کرتے ہیں۔ لڑکی کو آدھے دن کی چھٹی تھی،لیکن اس نے اپنے والدین کو یہ بتایا تھا کہ اسے گھر آنے میں کچھ تاخیر ہوگی ،کیونکہ وہ اپنے لئے کچھ کپڑے خریدنے کے لئے جانے والی ہے۔اس طرح والدین سے جھوٹ کہہ کر وہ صفوان کے ساتھ اس کے رشتے دار کے گھر آئی ہوئی تھی۔لڑکی کے والدین کو پولیس اسٹیشن میں طلب کرکے پوچھ تاچھ کرنے کے بعد لڑکی کوتنبیہ کرتے ہوئے ان کے ساتھ گھر بھیج دیا گیا۔اس کے علاوہ لڑکے کے والدین کو بھی اس واقعے کی اطلاع دی گئی۔