اڈپی ضلع مسلم متحدہ محاذ کی طرف سے ’معززین‘ کی کانفرنس۔اسلام کے تعلق سے’ سچائی گھر گھر تک‘پہنچانے کی مہم ہوگی شروع۔ یاسین ملپے کاخطاب
برہماور13؍فروری (ایس او نیوز) برہماور کے آڈیٹوریم میں منعقدہ معززین کی کانفرنس سے خطاب کرتے ہوئے اڈپی ضلع مسلم متحدہ محاذکے صدر یاسین ملپے نے کہا کہ اسلام کے تعلق ’سچائی گھر گھر تک‘ پہنچانے کی مہم شروع کی جارہی ہے۔اس تعلق سے مساجد کے صدوراور خطباء کو اس مہم میں زیادہ سے زیادہ دلچسپی لینی چاہیے۔ضلع کی 100مساجد میں سے ہر ایک مسجد کی طرف سے پانچ رکنی ٹیم تشکیل دینے اور تقریباً1لاکھ افراد تک اسلام کا پیغام پہنچانے کا نشانہ سامنے رکھا گیا ہے۔
انہوں نے مزید بتایا کہ ضلع متحدہ محاذ کا ایک وفدریاستی وزیر اعلیٰ اور کانگریسی لیڈروں سے ملاقات کرکے یہ مطالبہ ان کے سامنے رکھے گا کہ ریاستی انتظامیہ کی طرف سے کم ازکم تین مہینے میں ایک بار مسلمانوں کے مسائل پر غور وفکر کرنے کے لئے اجلاس منعقد کرے اور مساجد و مدارس قائم کرنے کے لئے جو سخت قوانین بنائے گئے ہیں انہیں آسان کردیا جائے۔
جناب یاسین ملپے نے کہا کہ مساجد کو صرف نمازوں کے لئے مخصوص کرنے کے بجائے سماج کی اصلاح و ترقی کے پروگرام بھی یہاں سے وضع کیے جانے چاہئیں۔ انہوں نے کہا کہ اڈپی ضلع کے ہر تعلقہ سے ۶ مساجد کے حساب سے جملہ ۳۰ مساجدکو منتخب کیا جائے گا اور مسلم متحدہ محاذ کا وفد ان مساجد کے ذمہ داران سے ملاقات کرتے ہوئے انہیں مسلم سماج کی تعلیمی اور معاشرتی اصلاح و ترقی کے سلسلے میں پروگرام مرتب کرنے کے لئے رہنمائی کرے گا۔ہر مسجد سے متعلق جماعت کے دائرۂ عمل میں آنے والے علاقے میں موجود غرباء، بیواؤں ، بے روزگاروں وغیرہ کے سلسلے میں ڈاٹا جمع کرنے کے لئے متحدہ محاذ کی طرف سے فارم فراہم کیے جائیں گے۔اس کے علاوہ آئندہ دنوں میں مسلمانوں کو سیاسی طور پر مستحکم اور مضبوط بنانے کے لئے اجلاس منعقد کیے جائیں گے۔انہوں نے مساجد کے ذمہ داران سے اپیل کی کہ فہرست رائے دہندگان میں چھوٹ جانے والے یا نئے نام داخل کرنے پر پوری توجہ دیں۔
اس اجلاس کا افتتاح کودرولی جامع مسجد کے خطیب مفتی عبدالمنّان نے کیا۔ متحدہ محاذ کے نائب صدر حاجی عبداللہ پرکل نے سالانہ مجلہ کا اجراء کیا۔
بنگلورو کے طہٰ متین نے اختتامی خطاب کیا۔مسلم اداروں کے وفاق کے صدر اور سابق میئر اشرف منگلورو، یونیویف کے صدر رفیع الدین کودرولی، نامور تاجر جلیل صاحب ادیاور، ضلع وقف مشاورتی بورڈ کے صدر ابراہیم مٹپاڈی، مولانا عبیداللہ ندوی،منگلورو آئی لینڈ فاؤنڈیشن کے عرفان، انجمن حامئی مسلمین بھٹکل جنرل سیکریٹری اسماعیل صدیق، سیکریٹری اسحاق شاہ بندری، محسن شاہ بندری ،مجلس اصلاح و تنظیم بھٹکل کے سیکریٹری مولاناسید یاسربرماور ندوی،نارتھ کینرا مسلم یونائٹیڈ فورم کے جنرل سیکریٹری محسن قاضی، تیرتھلّی مسلم متحدہ محاذ کے صدر سلیمان صاحب اور اڈپی ضلع کی مساجد کے خطباء، صدور اور سماجی اداروں کے ذمہ داران کی کثیر تعدا د اس اجلا میں شریک رہی۔
