کاروار میں زوردار بارش؛ مکان پر ناریل کا درخت گرنے سے ایک خاتون زخمی
کاروار 10/جون (ایس او نیوز) ساحلی اضلاع میں ہونے والی موسلادھار بارش سے کاروار تعلقہ بھی کافی متاثر ہوا ہے اور یہاں طوفانی ہوائوں کے ساتھ ہورہی بارش سے روزمرہ کی زندگی مفلوج ہوگئی ہے، بارش سے ایک طرف لوگوں کو گرمی سے راحت بھی ملی ہے، مگر کئی علاقوں میں مکانوں اور دفاتر پر درخت گرنے سے نقصانات کی بھی اطلاعا ت ہیں۔
بارش کے نتیجے میں سنیچر اور اتوار کی درمیانی شب کو یہاں ایک مکان پر ناریل کا درخت گرنے سے گھر کی چھت مکمل طور پر تباہ ہوگئی تو وہیں گھر کے اندر آرام کررہی ایک خاتون بھی زخمی ہوئی ہے۔ ناریل کا درخت گرنے سے گھر کی ایک دیوار کو بھی کافی نقصان پہنچا ہے۔
زخمی عورت کی شناخت چھایا گنپتی کی حیثیت سے کی گئی ہے۔ چھایانے بتایا کہ رات کی آخری پہر میں زوردار بارش کے نتیجے میں اچانک درخت گھر پر گرگیا، جس سے چھت کے کھپریل اس کے سر پر گرگئے، جس سے سر کو چوٹ لگی ہے۔ واقعے کی اطلاع ملنے پر سٹی میونسپل کارپوریشن کے اہلکاروں نے متعلقہ مکان پر پہنچ کر نقصانات کا جائزہ لیا ہے۔
سنیچر کو کاروار کے چاوڑی آفس پر بھی ایک درخت گرنے سے دفتر کی چھت کو شدید نقصان پہنچا ہے، البتہ آفس میں کوئی موجود نہ رہنے کی وجہ سے کسی کو چوٹ نہیں لگی۔
