بھٹکل کے ایک اُردو اسکول کے کمپائونڈ میں خون کے دھبے اور کھڑکی کے ٹوٹے گلاس پائے جانے کے بعد زبردست ہاتھاپائی ہونے کا شبہ
بھٹکل 19/مارچ (ایس او نیوز) یہاں مدینہ کالونی ، محی الدین اسٹریٹ میں واقع اُردو ہائیر پرائمری اسکول کی دیوار اور صحن پرجابجا خون کے دھبے اور چھینٹے سمیت ایک کھڑکی کا شیشہ ٹوٹا ہوا پائے جانے کے بعد شبہ ظاہر کیا جارہا ہے کہ یہاں رات کو زبردست ہاتھاپائی یا ماردھاڑ کی واردات رونما ہوئی ہے۔ واقعے کے بعد اسکول کے اساتذہ میں تشویش پائی جارہی ہے کہ آیا رات کو یہاں کس طرح کا واقعہ پیش آیا ہوگا۔
اسکول کے سنئیر اُستاد جناب غالب آوٹی نے بتایا کہ صبح نو بجے جیسے ہی وہ اسکول پہنچے، انہوں نے دیکھا کہ اسکول گیٹ کے قریب واقع دیوار پر دو تین جگہوں پر خون کے چھینٹے پڑے ہیں ، اسی طرح اسکول کے صحن پر بھی دو تین جگہوں پر خون کے دھبہ پڑے ہوئے ہیں ، انہوں نے فوراً ذمہ داران کو واقعے کی اطلاع دی، جس کے بعد مقامی پولس کو خبر دی گئی۔
جانکاری ملتے ہی میڈیا والے بھی اسکول پہنچ گئے، دیکھا گیا ہے کہ خون کے دھبے کے قریب ہی صابون کے پاوڈر کی پاکٹ بھی پڑی ہوئی ہے ، جس کے بعد شبہ ظاہر کیا جارہا ہے کہ اسکول کے صحن میں کافی مقدار میں خون بہا ہوگا، مگر صابون پاوڈر کی مدد سے پورے صحن کو صاف کیا گیا ہے، البتہ صحن کے نیچے کچھ جگہوں پر خون کے دھبے باقی رہ گئے ، اسی طرح دیواروں پر بھی خون کے چھینٹے باقی رہ گئے جو غالبا اندھیرا ہونے کی وجہ سے نظر نہیں آیا ہوگا۔ گمان کیا جارہاہے کہ رات کو یہاں زبردست ہاتھاپائی یا ماردھاڑ کی واردات ہوئی ہے ۔
خیال رہے کہ اس اُردو اسکول میں اول جماعت سے ساتویں جماعت تک تعلیم دی جاتی ہے، یہاں جملہ 40 طلبا ہیں جبکہ چار ٹیچرس ہیں۔
مضافاتی پولس نے اسکول پہنچ کر ضروری چھان بین کی ہے۔ تحقیقات جاری ہے۔