پتور میں اخلاقی پولس گری کے نام پر بجرنگ دل کارکنوں کی غنڈہ گردی:طلباء کی برتھ ڈے پارٹی میں مچایا ہنگامہ؛ دو گرفتار
مینگلور13؍اپریل (ایس او نیوز)اخلاقی پولیس گری کے نام پر سنگھ پریوار کی غنڈہ گردی کا ایک اور معاملہ قریبی تعلقہ پتور کے ایک ہوٹل میں پیش آیا ہے جہاں چل رہی طلباء کی برتھ ڈے پارٹی میں بجرنگ کے لیڈر اور کارکنان نے ہنگامہ کھڑا کردیا ۔
موصولہ رپورٹ کے مطابق ویویکانند کالج کے کچھ طلباء ایک ہوٹل میں دوپہر کے وقت اپنے ساتھی کی برتھ ڈے پارٹی منارہے تھے۔ اس وقت مقامی بجرنگ دل لیڈر سری دھر ٹانکیلا اور اس کے دیگر 10ساتھیوں نے زبردستی ہوٹل کے اندر گھس کر اس بات پر ہنگامہ کھڑا کیا کہ اس پارٹی میں ایک غیر مسلم طالب علم کیوں شامل ہے۔پھر سری دھراوراس کے ساتھیوں نے خود ہی پولیس اسٹیشن کو فون کرکے دھمکی دی کہ اگرپارٹی روکی نہیں گئی تو حالات بگڑجائیں گے۔
پولیس نے فوری طور پر مذکورہ ہوٹل میں پہنچ کر جائزہ لیا اور کوئی بھی غیر قانونی سرگرمی یا چیزیں وہاں پر نظر نہ آنے پر ان طلباء کو اپنے کالج واپس جانے دیا اور سری دھر ٹانکیلا اور اس کے دو ساتھیوں کو پارٹی میں رخنہ ڈالنے اور ہنگامہ آرائی کرنے کے الزام میں گرفتار کرلیا جبکہ اس کے بقیہ ساتھی وہاں سے بھاگ نکلنے میں کامیاب ہوگئے۔ پتور پولیس اسٹیشن میں کیس درج کرلیا گیا ہے اورمزید تحقیقات جاری ہے۔