اظہر الدین نے حیدرآباد کرکٹ ایسوسی ایشن کے انتخابات کو عدالت میں چیلنج دیا
حیدرآباد،17؍جنوری(ایس او نیوز؍آئی این ایس انڈیا)ٹیم انڈیا کے سابق کپتان محمد اظہر الدین نے منگل کو حیدرآباد کرکٹ ایسوسی ایشن کے صدر کے عہدے کے انتخابات کو عدالت میں چیلنج دے دیا۔واضح رہے کہ صدر کے عہدے کے لئے ان کی نامزدگی کو رد کر دیا گیا تھا،تبھی سے وہ اس فیصلے سے بیحد دکھی تھے،نامزدگی بھرنے کے بعد اظہر نے کہا تھا کہ وہ حیدرآباد کرکٹ کی حالت بہتر بنانا چاہتے ہیں۔انہوں نے کہاکہ حیدرآبادکی ٹیم رنجی کے سیمی فائنل میں بھی نہیں پہنچی وہیں اہم کھلاڑی ٹیم چھوڑ کر جا رہے ہیں۔اظہرالدین نے یہ الزام بھی لگایاتھا کہ حیدرآباد کرکٹ ایسوسی ایشن میں اقرباء پروری اور بدعنوانی انتہائی زیادہ ہے۔ان کے مطابق انڈر 14کرکٹ میں ہر میچ میں 6نئے کھلاڑی شامل کرلئے جاتے ہیں۔اظہر الدین نے 99ٹیسٹ میچ کھیلے اور 22سنچری کے ساتھ6ہزار سے زیادہ رن اور 334ون ڈے میں7سنچریوں کے ساتھ 9ہزار سے زیادہ رنز بنائے تھے لیکن سال 2000میں میچ فکسنگ کی وجہ سے بی سی سی آئی نے انہیں تاحیات پابندی کی سزا سنا دی تھی،تاہم 8نومبر 2012کو آندھرا پردیش ہائی کورٹ نے ثبوتوں کی عدم موجودگی میں اظہر الدین سے تاحیات پابندی کو ہٹانے کی بات کہی۔