بنگلورو 9؍مارچ (ایس او نیوز) ٹیپو جینتی کے پس منظر میں مرکزی وزیر اننت کمار ہیگڈے اور ضلع جنوبی کینرا کے رکن پارلیمان سی ٹی روی نے ٹیپو سلطان کے خلاف جو ہتک آمیز ریمارکس کیے تھے اس تعلق سے بنگلورو ہائی کورٹ نے ان دونوں کو نوٹس جاری کردئے ہیں۔

خیال رہے کہ میسور کے حکمراں اور انگریزوں کے خلاف لڑتے ہوئے جام شہادت نوش کرنے والے حضرت ٹیپو سلطان کی شان میں گستاخانہ باتیں اور بدکلامی کرنے کے خلاف عالَم پاشاہ نامی ایک شہری نے ہائی کورٹ میں پیٹیشن داخل کی ہے۔ اس پرسماعت کرتے ہوئے جسٹس آر بی بودیہال نے مرکزی وزیر اننت کمار ہیگڈے اور رکن پارلیمان سی ٹی روی کو نوٹس جاری کیا۔اس سے پہلے عالم پاشا ہ نے اس معاملے میں اندرا نگر پولیس اسٹیشن میں شکایت درج کروائی تھی مگر وہاں کی پولیس نے کارروائی کرنے میں کوئی دلچسپی نہیں دکھائی تو انہوں نے چیف میٹروپولیٹن عدالت میں پرائیویٹ کمپلینٹ داخل کرنے کی کوشش کی جسے عدالت نے مسترد کیا۔میٹروپولیٹین عدالت کے فیصلے کے خلاف عالم پاشاہ نے ہائی کورٹ میں اپیل داخل تو معاملے کی سماعت شروع ہوئی اور ملزمین کو نوٹس جاری کیے گئے ہیں۔

قارئین کو یاد ہوگا کہ امسال ٹیپو جینتی کے موقع پر اننت کمار ہیگڈے نے ٹیپو سلطان کو ’’بڑے پیمانے پر عصمت دری کرنے والا‘‘اور ’’بے رحم قاتل‘‘قرار دیتے ہوئے ریاسٹی حکومت کی انتظامیہ سے کہا تھا کہ ٹیپو جینتی جیسے ’’شرمناک‘‘ پروگرام میں انہیں مدعو نہ کیا جائے۔ س کے علاوہ سی ٹی روی اور دیگر بی جے پی کے لیڈران نے بھی ٹیپو سلطان کے خلاف زہریلی اور شرمناک زبان کا استعمال کیاتھا۔