بھٹکل 23/جون (ایس او نیوز) ضلع اُتر کنڑا کے یلاپور تعلقہ کی مشہور شخصیت، ممتاز ہوٹل کے مالک  اور کئی اداروں کے سرگرم رکن  جناب عبدالرحمن حسن بیری 67 سال کی عمر میں آج  اتوار کو  انتقال کرگئے۔ انا للہ و انا الیہ راجعون

  جناب عبدالرحمن صاحب   اُترکنڑا مسلم یونائیٹید فورم کے بانیان میں سے   تھے۔ آپ  ملت تعلیمی ادارہ میں صدر کی حیثیت سے بھی خدمات انجام دے چکے ہیں جبکہ مرحوم  صدیقیہ  ویلفئیر سنگھ کے سرگرم رکن تھے۔

بہت ہی مخلص اور لوگوں کے  دکھ درد میں کام آنے والے اور ملت کا درد رکھنے والے انسان تھے۔ آپ کے انتقال پر پورے یلاپور میں  ماتم  چھا گیا اور  گھروالوں سے تعزیت کرنے کثیر تعداد میں لوگ ان کے مکان  پر جمع ہوگئے۔ 

گھروالوں کے مطابق بعد نماز  مغرب  قریبی  قبرستان میں تدفین عمل میں آئے گی۔

ان کے انتقال پر  نارتھ کینرا  مسلم یونائیٹیڈ فورم کے   صدر جناب امتیاز شیخ، جنرل سکریٹری جناب محسن قاضی، سرگرم رکن  علی جناب ،  مجلس اصلاح و تنظیم بھٹکل کے صدر جناب ایس ایم پرویز اور جنرل سکریٹری  جناب عبدالرقیب ایم جے ندوی، ڈاکٹر محمد حنیف شباب، جناب  سید محی الدین برماور اور  یحیٰ دامودی  سمیت کافی  دیگر ذمہ داران نے  گہرے دکھ کا اظہار کیا ہے اور ان کے حق میں مغفرت کی دعائیں کی ہیں۔