بھٹکل: مرڈیشورمیں خاتون کا گلا کاٹ کر قتل؛ شوہرگرفتار
بھٹکل 17/اکتوبر (ایس او نیوز) تعلقہ کے کائیکنی میں ایک خاتون کا قتل کرکے گھر کے باہر پھینکے جانے کی اطلاع کے بعد پولس نے قتل کے الزام میں اُسی کے شوہرکواپنی تحویل میں لے لیا ہے۔ واردات منگل شام قریب آٹھ بجے پیش آئی۔
مقتول خاتون کی شناخت نندنی لوکیش نائک (30) کی حیثیت سے کی گئی ہے۔ ذرائع سے ملی اطلاع کے مطابق خاتون مینگلور کی رہائشی تھی، مگر قریب دس بارہ سال پہلے مرڈیشور کے لوکیش نائک کےساتھ اس کی شادی ہوئی تھی، جس کے بعد سے ہی وہ مرڈیشور میں شوہر کےساتھ رہ رہی تھی۔ بتایا جارہا ہے کہ خاندانی تنازعہ کے پس منظر میں شوہر نے ہی اس کا گلا کاٹ کرقتل کیا ہے۔
پتہ چلا ہے کہ متوفی کا ایک بیٹا اورایک بیٹی ہے۔ شوہراوربیوی مرڈیشور ناڈن کیری میں رہتے تھے، لیکن گذشتہ تین دنوں سے یہ لوگ کائیکنی سبتّی کراس کے ایک مکان میں رہ رہے تھے۔ ذرائع کی مانیں تو شوہر نے بیوی کا گلا کاٹ کر بے دردی کے ساتھ اُسے موت کے گھاٹ اُتاردیا اورموقع پرسے فرارہوگیا۔
گھر کے باہرخون میں لت پت خاتون کی نعش دیکھ کر پڑوسیوں نے پولس کواطلاع دی۔ اطلاع ملتے ہی مرڈیشورپولس انسپکٹرسنتوش کائیکنی، پی ایس آئی منجوناتھ اورپولس کی پوری ٹیم جائے وقوع پرپہنچ گئی۔ بعد میں پولس نے کچھ ہی گھنٹوں میں فرار شوہرلوکیش نائک کو ایک نجی ہوٹل میں دھرلیا اور اپنی تحویل میں لے لیا۔
واقعے کی اطلاع ملتے ہی گاوں کے سینکڑوں لوگ جائے وقوع پرجمع ہوگئے ماں کو کھونے والے بچوں کے ساتھ ساتھ دیگراہل خانہ کا رو رو کر برا حال تھا۔
خبر ملتے ہی کاروارسے ضلع کے ایس پی وشنو وردھن اور بھٹکل ڈی وائی ایس پی شریکانت بھی جائے وقوع پر پہنچ گئے اورحالات کا جائزہ لیتے ہوئے ضروری کاروائی کی۔
مرڈیشور پولس تھانہ میں معاملہ درج کیا گیا ہے، چھان بین جاری ہے۔
Bhatkal: Brutal murder of mother of two in Murdeswar
