پارلیمانی انتخاب کے لئے ضلع شمالی کینرا میں تعداد 1.16لاکھ ووٹرس کا اضافہ
کاروار 13؍اپریل (ایس او نیوز) ضلع شمالی کینرا میں اس مرتبہ پارلیمانی انتخابات میں اپنا حق رائے دہی استعمال کرنے والوں کی تعداد 1.16لاکھ ووٹرس کا اضافہ ہوا ہے۔لیکن2009کے سابقہ پارلیمانی انتخاب کا موازنہ کریں تو یہ تعداد کچھ کم ہوئی ہے ، کیونکہ 2009میں فہرست رائے دہندگان میں 1.30لاکھ ووٹرس کا اضافہ دیکھا گیا تھا۔
خیال رہے کہ ضلع شمالی کینرا میں 8اسمبلی حلقے شامل ہیں 23اپریل کو یہاں پارلیمانی حلقے کے لئے پولنگ ہونے والی ہے اور ضلع انتظامیہ نے اس کے لئے اپنی تیاریاں تقریباً مکمل کرلی ہیں۔ ہر پارلیمانی انتخاب کے دوران یہاں پر ایک لاکھ سے زیادہ ووٹرس کا اضافہ دیکھنے میں آتا ہے ۔2009میں یہاں ووٹرس کی کل تعداد 12,86,556تھی جبکہ 2019میں یہ تعداد15,33,926ہوگئی ہے۔ اس حلقے میں جملہ 1922پولنگ بوتھس موجود ہیں۔
ضلع الیکشن آفیسر ڈاکٹر ہریش کمار نے بتایا کہ بوتھ لیول پر ووٹرس کے ساتھ تعاون کرنے کے لئے مراکز قائم کیے گئے ہیں۔ ووٹنگ کی سلِپ گھر گھر جاکر فراہم کرنے اور ووٹروں کی رہنمائی کرنے کی ذمہ داری افسرا ن اوراہلکاروں کو سونپی گئی ہے۔الیکشن کے تعلق سے سی ویجل سسٹم کا استعمال کرنے میں ضلع شمالی کینرا پوری ریاست میں پانچویں نمبر پر ہے۔ووٹنگ کے تعلق سے عوام کے اندر پوری طرح بیداری لانے کا کام کیا گیا ہے ۔پولنگ بوتھس کے افسران کو ضروری تربیت دی گئی ہے۔کمٹہ کے وی وی بالیگا کالج میں ووٹوں کی گنتی کے لئے تمام انتظامات مکمل کرلیے گئے ہیں۔انہوں نے امیدظاہر کی ہے کہ الیکشن کی بقیہ کارروائی پرامن طریقے پر خوش اسلوبی کے ساتھ انجام دی جائے گی۔
ضلع پنچایت چیف ایکزیکٹیو آفیسر نے بتایا کہ ریاست میں پہلی بارضلع شمالی کینرامیں نابینا ووٹرس کے لئے بریئل سسٹم والی بیلیٹ شیٹ فراہم کی جارہی ہے۔ اس کے علاوہ الیکشن میں حصہ لینے پر ووٹرس کوآمادہ کرنے کی ایک مہم کے طور پرآئندہ دنوں میں معذور ووٹرس کے لئے پیراگلائڈنگ اور نوجوان ووٹرس کے لئے اسکوبا ڈائیونگ کے مواقع فراہم کیے جائیں گے۔