اُترکنڑا رکن پارلیمان اننت کمار ہیگڈے کو سوشیل میڈیا پر بنایاجارہا ہے تنقید کا نشانہ
بھٹکل 20/جون (ایس او نیوز)ضلع شمالی کینرا کے ایم پی اننت کمار ہیگڈے نے جب پارلیمنٹ میں سنسکرت زبان میں حلف اٹھایا تو سوشیل میڈیا پر ان کے خلاف نکتہ چینی اور تنقید کا سلسلہ چل پڑا ہے۔
اننت کمار ہیگڈے کو تنقید کا نشانہ بنانے کا اصل سبب یہ بتایا جاتا ہے کہ انہوں نے ضلع شمالی کینرا میں سوپراسپیشالٹی اسپتال قائم کرنے کے لئے چلائی جارہی مہم پر کوئی توجہ نہیں دی تھی اور اپنا کوئی رد عمل ظاہر نہیں کیا تھا۔جبکہ کرناٹکا کے وزیر اعلیٰ کمارا سوامی تک نے اس مہم پر اپنا مثبت ردعمل ظاہر کرتے ہوئے ضروری اقدام کرنے کا تیقن دیا تھا۔ اننت کمار ہیگڈے نے جدید ترین سہولتوں والے اسپتال کی مانگ کرنے والوں کو اپنے ٹویٹر اکاؤنٹ پر بلاک بھی کردیا تھا جس سے عوام اور خاص کرکے اسپتال کے لئے مہم چلانے والے نوجوان اننت کمار کے خلاف برہم ہوگئے تھے۔
اننت کمارہیگڈے نے جب پارلیمان میں سنسکرت میں حلف لیا تو سوشیل میڈیا پر فقرے بازی کا سلسلہ چل پڑا جس میں طنزیہ طورپر یہ بات بھی کہی گئی ہے کہ اننت کمار صرف سنسکرت جانتے ہیں اور کنڑا اورانگلش سے بابلد ہیں اس لئے انہوں نے اسپتال کے مطالبے والی مہم کا کوئی جواب نہیں دیا ہوگا۔ بعض افراد نے ٹویٹر پراننت کمار کے سامنے سنسکرت میں ہی اسپتال کی مانگ رکھی ہے۔لیکن اننت کمار نے اس تعلق سے ابھی تک کوئی ردعمل ظاہر نہیں کیا ہے۔