شمالی کینرا پارلیمانی امیدوار آنند اسنوٹیکر کی انتخابی مہم میں وزیراعلیٰ کمارا سوامی اور ضلع انچارج وزیر دیشپانڈے کی شرکت
کاروار19؍اپریل (ایس او نیوز) ضلع شمالی کینرا کی پارلیمانی سیٹ پرمرکزی وزیر اور بی جے پی امیدواراننت کمار ہیگڈے کے خلاف جنتادل ایس اور کانگریس کے مشترکہ امیدوار آنند اسنوٹیکر کی تشہیری مہم میں اس وقت تیزی آگئی جب ریاستی وزیراعلیٰ کماراسوامی اور ضلع انچارج وزیر آر وی دیشپانڈے نے مختلف مقامات پر انتخابی مہم میں حصہ لیا اور جلسوں سے خطاب کیا۔
ڈانڈیلی میں کماراسوامی کا خطاب: ڈانڈیلی کے پرانے نگر سبھا میدان میں منعقدہ ایک اجلاس سے خطاب کرتے ہوئے وزیراعلیٰ کماراسوامی نے کہا کہ علاقے کی ترقی کے لئے آنند اسنوٹیکر کو ووٹ دے کرانتخاب میں کامیاب کیا جائے۔انہوں نے کہا کہ حکومت کو عوام کی فلاح اور ترقی کے لئے کام کرنا چاہئے۔ گزشتہ پانچ سال مودی حکومت نے صرف وعدوں پرگزاردئے۔ حقیقی معنوں میں عوام کی ترقی کے لئے کچھ نہیں کیا۔جبکہ ہم لوگ ہمارے ترقیاتی منصوبوں کو سامنے رکھ کر انتخابات کا سامنا کررہے ہیں۔انہوں نے عوام سے اپیل کی کہ اس مرتبہ کانگریس اور جنتا دل ایس کے مشترکہ امیدوار کو جیت دلاکر ضلع شمالی کینرا کی ترقی کے لئے کام کرنے کا موقع فراہم کریں۔انہوں نے کہا کہ آنے والے دنوں میں غریبوں، کسانوں، بے روزگاروں اورقلی مزدوری کرنے والوں کے لئے مزید فلاحی منصوبوں پر عمل کیا جائے گا۔
کانگریس کے سنئیر لیڈر، ضلع انچارج اور ریوینیو وزیر آر وی دیشپانڈے نے عوام سے اپیل کی کہ جنتا دل اور کانگریس کے مشترکہ امیدوار کو انتخاب میں زبردست جیت دلانے کے لئے سرگرم ہوجائیں۔ انہوں نے سدارامیا کی قیادت والی سابقہ ریاستی حکومت کی جانب سے کیے گئے عوامی فلاحی منصوبوں کا حوالہ دیتے ہوئے کہا آئندہ بھی کئی اہم منصوبوں پر عمل کیا جائے گا۔اس لئے اس مرتبہ اس علاقے سے آنند اسنوٹیکر کو کامیاب کیا جائے۔اس پروگرام میں ودھان پریشد کے اراکین بسواراج ہوراٹّی،ایم ایل گھوٹنیکر اور رکن اسمبلی کوناریڈی نے بھی عوام سے اپیل کی کہ مشترکہ امیدوار کی جیت کو یقینی بنائیں۔
بیلگام میں انتخابی تشہیر : بیلگاوی ضلع کے ایم کے ہبلی میں ایک انتخابی اجلاس سے خطاب کرتے ہوئے کماراسوامی نے کہا کہ بیلگاوی میں سوورنا سودھا کی تعمیر اس دور میں ہوئی تھی جب میں ریاست کا وزیر اعلیٰ تھا۔اب کی بار میں نے کسانوں کا قرضہ معاف کردیا ہے۔ 60 سال سے زائد عمر کے بزرگ شہریوں کو 1000ہزار روپیوں کا وظیفہ جاری کیا ہے۔مودی حکومت نے دو کروڑ نوکریاں دینے کا وعدہ کیا تھالیکن انہوں نے لوگوں کی نوکریاں چھیننے کا کام کیا ہے۔
اس موقع پر امیدوار آنند اسنوٹیکر نے کہا کہ اگر عوام مجھے ا س مرتبہ رکن پارلیمان منتخب کرتے ہیں تو میں کسانوں کی فلاح کے لئے کام کروں گا۔ اس کے علاوہ صنعتوں کو فروغ دینے کے منصوبوں پر بھی عمل کیا جائے گا۔
کمٹہ میں اخباری نمائندوں سے بات چیت: کمٹہ میں اخباری نمائندوں سے بات چیت کرتے ہوئے وزیراعلیٰ کماراسوامی نے بی جے پی امیدوار اننت کمار ہیگڈے پر طنزیہ چوٹ کرتے ہوئے کہا کہ : ’’ 23اپریل کے بعد ایسا موقع آئے گا کہ لوگ پوچھنے لگیں گے کہ بھئی اننت کمار تم کہاں ہو؟‘‘ انہوں نے مزید یہ بھی کہا کہ پہلے مرحلے میں جہاں انتخابات ہوئے ہیں ان14سیٹوں پر مشترکہ امیدوار بھاری جیت درج کرنے والے ہیں۔انہوں نے اپنے بیٹے کی جیت بھی یقینی ہونے کی بات کہی۔وزیر اعلیٰ نے سرسی اور سداپور میں بی جے پی امیدوار اننت کمار ہیگڈے کے قریبی افراد سے ضبط کی گئی رقم کے سلسلے میں تبصرہ کرتے ہوئے کہا کہ مرکزی وزیر اپنی لوٹی ہوئی رقم سے ووٹ خریدنے کی مہم پر نکلے ہیں۔ پہلے نوجوان ان کے ساتھ تھے مگر اب کی بار ووٹ دلانے کے لئے ان کے پاس نوجوان نہیں ہیں اس لئے نوٹوں کاسہارا لیا جارہا ہے۔
بی جے پی کی طرف سے نریندرا مودی کے نام پر ووٹ طلب کیے جانے کا جو سلسلہ چل پڑا ہے اس پر تلخ تبصرہ کرتے ہوئے انہوں نے کہا کہ بی جے پی امیدواروں کو مودی کی تصویر اٹھاکر ووٹ مانگنے کے لئے نکلنا چاہیے۔انہوں نے کہا کہ اس انتخاب میں عوام بی جے پی کو اچھا سبق سکھائیں گے۔
خیال رہے کہ بدھ کو بھٹکل میں بھی انتخابی جلسہ منعقد کیا گیا تھا جس میں کانگریس کے رہنما دیش پانڈے سمیت بھٹکل کے سابق رکن اسمبلی منکال وئیدیا، جےڈی نائک سمیت دیگر کافی لیڈران نے شرکت کی تھی۔ بھٹکل میں منعقدہ انتخابی جلسہ میں اُترکنڑا کے کانگریس۔جے ڈی ایس مشترکہ اُمیدوار آنند اسنوٹیکر نے خطاب کرتے ہوئے بھٹکل کے عوام سے درخواست کی تھی اس بار کے الیکشن میں اُنہیں ایک موقع دیا جائے۔