بھٹکل:9؍ستمبر(ایس اؤ نیوز) لوک آیوکتہ قانون کےتحت عوامی مسائل اور شکایات کا حل نکالنےکی کوشش کی جائے گی، کسی بھی محکمہ کے آفسران سفارش یا رقم کے ذریعے کام انجام نہیں دے سکتے۔ یہ بات  ضلع لوک آیوکتہ ڈی وائی ایس پی اروند کلگجی نے کہی۔ وہ یہاں پیر کو تعلقہ پنچایت ہال میں منعقدہ کرناٹکالوک آیوکتہ عوامی شکایات وصول میٹنگ میں عوام سے خطاب کررہےتھے۔ انہوں نے کہاکہ سرکاری آفسران کے لئے  ضروری ہے کہ   عوامی عرضیوں پر  متعینہ وقت کے اندر  فیصلہ لیں اور  عوامی مسائل اور ان کے سوالات کا جواب دینے میں  ٹال مٹول نہ کریں۔ انہوں نے کہا کہ  ضلع کے مختلف تعلقہ جات میں خدمات انجام دے رہے افسران کی فہرست ہمارے پاس موجود ہے، انہوں نے غیرقانونی کاموں سے دور رہنے کا مشورہ دیا۔

میٹنگ کی شروعات میں  ماولی گرام پنچایت -1حدودکی 2غیرقانونی عمارتوں کو  منہدم کرنے  کےپنچایت افسر کا حکم ہونے کے باوجود منہدم نہ کرنے پر پنچایت ممبر جینت نائک نے لوک آیوکتہ افسران کی  توجہ دلائی۔ اس کی وضاحت کرتےہوئے افسران نے کہاکہ متعلقہ عمارات کو دئیے گئے بجلی کنکشن کاٹنے کے لئے ہسکام محکمہ کوخط لکھاگیاہے۔ معاملے پر ہیسکام انجنئیر منجوناتھ نے بتایاکہ اس سے قبل پنچایت کی طرف سے اجازت دی گئی تھی اب اس کو کاٹنے کہیں تو ممکن نہیں ہے۔ پہلے پنچایت کی طرف سے عمارت کو دی گئی منظوری منسوخ کی جانی چاہئے۔ لوک آیوکتہ ڈی وائی ایس پی اروند نے پنچایت اور ہیسکام افسران کو تاکید کی کہ وہ اس تعلق سے  اگلے 15دنوں کے اندر  واضح فیصلہ لیں۔

یلووڑی کووؤر کے مکین ناگیندر نائک نے ہیرور میں عمارت کی تعمیر کولے کر اپنا مسئلہ پیش کیا۔ بھٹکل میں زیر تعمیر نئے بس اسٹانڈ اور اندراکینٹین متعینہ مدت میں مکمل نہ  ہونے پر عوامی عرضی لوک آیوکتہ کو دی گئی ۔ لوک آیوکتہ سی پی آئی منجوناتھ ، تحصیلدار وی پی کوٹرولی، تعلقہ پنچایت افسر لکشمی نارائن سوامی موجود تھے۔