کاروار:17؍فروری(ایس اؤ نیوز) شہر کے کاجوباغ میں واقع ضلع پولس پریڈ میدان میں فرینڈ شپ بھائی چارگی کپ کرکٹ ٹورنامنٹ میں اترکنڑا ضلع ڈپٹی کمشنر ڈاکٹر ہریش کمار کی قیادت والی ڈی سی الیون ٹیم نے پریس الیون ٹیم کو دو رنوں سے شکست دے دی اور شاندار جیت حاصل درج کی۔
سنئیر سول جج ٹی گوندیا نے ٹورنامنٹ کا افتتاح کرنے کے بعد نیک خواہشات کا اظہار کیا۔ ہمیشہ دباؤ میں رہنے والے افسران اور رپورٹروں نے خیر سگالی کی علامت کے طورپر کرکٹ میچ کھیلتے ہوئے خوشی و مسرت کو محسوس کیا۔ ڈی سی الیون ٹیم کی قیادت ڈی سی ڈاکٹر ہریش کمار کررہے تھے تو پریس الیون ٹیم کی قیادت ٹی بی ہری کانت سنبھال رہے تھے۔
12اوورس کے میچ میں ڈی سی الیون ٹیم نے 7وکٹ کھوکر 104رن بنائے۔ نائب کپتان ضلع کے ایس پی شیوپرکاش دیوراج نے بہترین بلے بازی کا مظاہرہ کرتےہوئے 32رن بنائے۔ ڈی سی ہریش کمار، ایڈیشنل ڈی سی ناگراج سنگریر، ڈانڈیلی کے بلدیہ کمشنر سید ، گوکرن کے ایس آئی نوین نائک نے ایس پی کا باری باری ساتھ دیا۔ پر یس الیون کی طرف سے واسو دیو گوڈا نے 4وکٹ حاصل کئے۔
میچ بے حد دلچسپ رہا اور جیت کے لئے 105رنوں کا پیچھا کرتےہوئے پریس الیون مقررہ 12اووروں میں 8وکٹ کے نقصان پر 102رن بناپائے۔
پریس الیون ٹیم کو شروعات میں ہی جھٹکا لگا ، مگر بھرت راج نے دھواں دھار بلے بازی کرتےہوئے ٹیم میں جان بھرنےکی کوشش کی ۔ لیکن مڈل آرڈر بلے بازوں کے وکٹیں کھونے سے ٹیم دباؤ کا شکار ہوگئی۔ اسی دوران ششی دھر گوندلی نے تیز رفتار 27رن بنائے۔ اوپنر کے طورپر درشن نے 42رن بنائے تھے۔ آخر کار ڈی سی الیون نے 2رنوں سے جیت حاصل کی۔
ایس پی شیوپرکاش دیورا ج کے آل راؤنڈر مظاہرے پر انہیں مین آف دی میچ ایوارڈ سے نوازا گیا تو بہترین بلے بازی کا مظاہرہ کرنےو الے پریس الیون ٹیم کے درشن نائک کو بہترین بلے باز اور ایس آئی سنپت کمار کو بیسٹ بالر کے ایوارڈ سے نوازا گیا۔