بھٹکل 30 جنوری (ایس او نیوز)  ایک نامعلوم نوجوان  چلتی ٹرین   سے  ٹکرا کر ہلاک ہوگیا، جس کی شناخت ہنوز ہونی باقی ہے۔ بعض حلقوں میں کہا جارہا تھا کہ  نوجوان خودکشی کے مقصد سے  خود  ٹرین سے ٹکرا گیا تھا، مگرپولس   ذرائع نے بتایا کہ وہ خودکشی نہیں تھی بلکہ  حادثاتی طور پر وہ ٹرین سے ٹکراگیا تھا جس کی وجہ سے اس کی موت واقع ہوگئی۔ واردات تعلقہ کے مرڈیشور میں پیر شام کو پیش آئی۔

پتہ چلا ہے کہ کاروار سے بھٹکل ہوکر بنگلور جانے والی  پنج گنگا  ایکسپریس ٹرین جب مرڈیشور سے گذررہی تھی تو اس دوران یہ شخص  پٹری کرکراس کررہا تھا جس کے دوران اچانک ٹرین اس سے ٹکراگئی اور موقع پر ہی اس کی موت واقع ہوگئی۔

ٹرین ٹکرانے سے  مہلوک کے اوپری حصہ بالخصوص چہرے کو کافی چوٹیں آئی ہیں۔

پولس ذرائع نے بتایا کہ یہ ایک بھکاری  شخص  تھا جو کافی دنوں سے ریلوے پلیٹ فارم پر ہی سوتا تھا اور لوگوں سے بھیک  مانگ  کر اپنا گذارہ کررہا تھا، یہ بھی پتہ چلا ہے کہ  وہ  بیمار بھی تھا اور ذہنی طور پر بھی  حالت ٹھیک نہیں تھی۔ البتہ یہ شخص کون ہے، کہاں کا رہنے والا ہے، اس تعلق سے کوئی جانکاری نہیں مل پائی ہے۔ سی سی ٹی وی فوٹیج کی بنیاد پر  معلوم ہوا ہے کہ   پٹری کراسنگ کے دوران اچانک ٹرین آجانے سے  وہ ٹرین کی زد میں آکر ہلاک ہوا ہے ۔

نعش کو مرڈیشور سرکاری اسپتال کے مردہ خانے منتقل کیا گیا ہے،ریلوے  پولس نے معاملہ درج کرلیا ہے اور    جانچ جاری ہے۔