اڈپی، 23 / ستمبر (ایس او نیوز) اڈپی ضلع انچارج وزیر لکشمی ہیبالکر نے اخبار نویسوں سے بات چیت کرتے ہوئے کہا کہ قانون کی پابندی کرنا ہر ایک شہری کا فرض ہے ۔ ہم غیر اخلاقی پولیس گری کو ہرگز برداشت نہیں کریں گے ۔ اس طرح کی سرگرمیوں کے خلاف ہر طرح کے قانونی اقدامات کیے جائیں ۔ 
    
وزیر ہیبالکر نے کہا کہ کاویری ندی کے پانی تمل ناڈو کو جاری کرنے کے سلسلے میں ریاستی حکومت کی پالیسی بالکل صاف اور واضح ہے ۔ میرا موقف یہ ہے کہ ہماری ریاست کے ساتھ نا انصافی نہیں ہونی چاہیے ۔ سپریم کورٹ کا حکم  ماننا ہمارے لئے ضروری ہے ۔ ایسے حالات میں ہمیں برسات کے لئے دعا کرنی چاہیے ۔  ہماری حکومت عوام دوست پالیسیوں پر عمل پیرا ہے ۔ کسانوں کے مفادات کی حفاظت کرنا ہماری ذمہ داری ہے ۔ اس سلسلے میں ہاتھ باندھ کر خاموش نہیں بیٹھے ہیں ۔  ہمارے وزیر اعلیٰ نے تین روز تک دہلی میں قیام کرتے ہوئے جل شکتی محکمہ کے وزیر سے ملاقات کی اور انہیں میمورنڈم دیا ہے ۔ سپریم کورٹ میں ریاست کا موقف درست تھا یا نہیں اس پر بحث کرنے کے بجائے ہمارا اگلا قدم کیا ہونا چاہیے یہ سوچنا اہم ہے ۔ 
    
خواتین ریزرویشن بل کے تعلق سے لکشمی ہیبالکر نے کہا کہ اس بل کو لانے والے وزیر اعظم مودی کی میں ستائش کرتی ہوں ۔ کانگریس پارٹی شروع سے ہی عورتوں کے مفادات کے ساتھ کھڑی ہے ۔ اور اس نے اس سے قبل کئی مرتبہ اس بل کو لانے کی کوشش کی ہے ۔ اس طرح کے کام کرنے کے لئے بڑی ہمت کی ضرورت ہوتی ہے ۔ بینکوں کو قومیانے ، لینڈ ریفارمس کے ذریعے لوگوں کو زمین کا مالک بنانے اور 18 سال کی عمر میں ووٹنگ کا حق دینے جیسے اہم اقدامات اندرا گاندھی اور راجیو گاندھی نے کیے تھے ۔ 
    
قحط زدہ علاقہ قرار دینے کے سلسلے میں کسی بھی قسم کی سیاست یا جانبداری کی بات کو مسترد کرتے ہوئے وزیر لکشمی ہیبالکر نے کہا کہ اڈپی ضلع کا صرف کارکلا تعلقہ قحط زدہ قرار دیا گیا ہے ۔ آئندہ جو فہرست جاری ہونے والی ہے اس میں مزید تعلقہ جات شامل کیے جائیں گے ۔ بیلگاوی ضلع کے 14 میں سے 13 تعلقہ جات قحط زدہ قرار دئے گئے ہیں ۔ لیکن میرے اپنے علاقہ کو قحط زدہ زمرہ میں شامل نہیں کیا گیا ہے ۔ یہ اس بات ثبوت ہے کہ اس معاملے میں کوئی سیاست نہیں ہو رہی ہے ۔